Kohima, Jymmang:
U MP ka Lok Sabha na ka jylla Nagaland, u Tokheho Yepthomi ha ki khyndiat sngi kiba la leit noh u la pynkynmaw biang sa shisien ïa ki tnat sorkar bapher bapher jong ka jylla ba ki dei ban pyntrei janai bad pyndep ha ka por kaba kloi ïa ki skhim bad ki projek bapher bapher jong ka Sorkar Pdeng kiba la pyntrei ha Nagaland.
Na ka liang u MP u la bthah ïa ki tnat sorkar ba kin pyntikna ba ïa ki skhim Sorkar Pdeng yn pyntrei na ka bynta ka bha ka miat jong kito ki nongshong shnong kiba don hok ban ïoh ïa ki jingïarap. Ïa katei, u MP u la pynsngew ha ka jingïalang jong ka District Co-ordination & Monitoring Committee (DISHA) kaba la pynlong ha ka conference hall jong u DC, Wokha.
Ha ka jingïalang, na ka liang u MP u la pyntip shuh shuh ba naduh u snem ba mynta, ka sorkar jylla kan donkam ban pyllait ïa ka ‘State Share’ kaba 10%, bad hadien katei ka Sorkar Pdeng kan sa pyllait sa ïa 90% ka ‘central share’ hapoh ki 30 sngi. Na ka liang u MP u la kyntu ruh ïa ki bor sorkar kiba halor ba ki dei ban pyndep janai ïa ki kamram ba la bynshet ha ki na ka bynta ka bha ka miat bad ka roi ka par jong ka jylla.
