Shillong, Jymmang 24:
U Eberechi Eze u la shah khot sha ka kynhun ïalehkai jong ka England ha ka sien kaba nyngkong na ka bynta ka lympung ïaknieh jong ka Euro 2024 qualifiers ka ban long ha u bnai ban wan, hynrei u Raheem Sterling u la mih noh na kane ka kynhun.
Utei u rangïalehkai shapdeng ka Crystal Palace (Eze) u la shah kynthup hadien ba u lah ban thep haduh hynriew kol na ki phra tylli ki jingïalehkai jong ka Premier League.
U rangïalehkai shakhmat ka Chelsea u Sterling u la duh noh ïa kane ka lad hadien ka jingïakren sngewthuh jingmut lang bad u coach u Gareth Southgate.
Ha katei ka lympung ïaknieh, ka England kan ïakynduh ïa ka Malta ha Ta’ Qali ka ban long ha ka 16 tarik u Jylliew shwa ban kan ïakhun pyrshah ïa ka North Macedonia ha Old Trafford hadien lai sngi.
Ka England ka la bat ïa ka kyrdan ba hakhlieh jong ka Group-C hadien ba ka lah ban pynliem noh ïa ka Italy bad ka Ukraine ha ki ar tylli ki jingïalehkai jong kane ka lympung ïaknieh ha u Lber mynta u snem.
Haba pynpaw halor ka daw jong ka jingmih noh u Sterling na ka kynhun, u Southgate u la ong, “Um da sngewhun mynsiem ban ïalehkai na ka daw ka jingmynsaw ha ka met. U la sngewthuh lypa ba un ym lah ban ïalehkai bha kumba u dei ban long.”
Kiwei pat ki rangïalehkai kiba la shah khot ha katei ka kynhun ki long u Trent Alexander-Arnold, Tyrone Mings bad u Lewis Dunk.
U Dunk, uba la ïoh ban ïalehkai khatduh ha ka jingïakhun pyrshah ïa ka USA ha u 2018, u la wanphai biang sha ka kynhun hadien ba u la lah ban pynurlong ïa ka Brighton ban ïoh rung ha ka sien kaba nyngkong ha ka lympung jong ka dewbah Europe.
Ki lai ngut ki rangïalehkai ka Chelsea, u Reece James, Mason Mount bad u Ben Chilwell kin duh ïalehkai na ka daw ka jingmynsaw, ha kaba ym don jaka ruh na ka bynta u rangïalehkai ka Arsenal u Ben White, u Eric Dier jong ka Tottenham, Conor Coady na ka Everton lane u Fikayo Tomori jong ka AC Milan.
U rangapkol ka Newcastle u Nick Pope ruh um shym la shah kynthup namar u donkam ban shah sumar namar ka jingmynsaw ha ka kti, katba u Sam Johnstone na ka Crystal Palace u la shah khot ha ka sien kaba nyngkong eh naduh ba u la ïoh ban mih bujli ha u Lber, 2022.
Ki rangïalehkai ka Manchester City kiba kynthup ïa u John Stones, Kyle Walker, Phil Foden, Jack Grealish bad u Kalvin Phillips ki la shah kynthup. Kine kin sa wan ïasoh lang sha ka kynhun hadien namar kin hap ban pynkhreh shwa ïa ka jingïakhun final ha ka Champions League pyrshah ïa ka Inter Milan ka ban long ha ka 10 tarik u Jylliew.
Kane kajuh ka wan jia ruh ïa u kapten ka West Ham u Declan Rice, namar kane ka kynhun kan pynkhreh ban ïakhun pyrshah ïa ka Fiorentina ha ka final jong ka Europa Conference League ka ban long ha ka 7 tarik u Jylliew.
