Shillong, Jymmang 24:
Ka Meghalaya High Court ha ka Sngi Balang ka la pan jingshai ha kano ka rukom la buh ïa ki kor thep ‘vote’ lane ki ‘Electronic Voting Machine’ (EVM), bad na ka liang u muktiar uba mihkhmat ïa u Chief Electoral Officer (CEO) u la ïoh por lai taïew ban wad bniah halor kane bad hadien kata, un sa hap ai da ka jingthoh sha ka ïingbishar.
Kane ka jingbthah jong ka High Court ka long ha ka por ba ka la shong bishar ïa ka mukotduma ba la ai da u CEO bad kiwei pat pyrshah ïa u Bah K. Phlastingwell Pangniang uba dei u President ka HSPDP bad kyrtong ka seng na Rambrai Jyrngam konstitwensi ha ka ilekshon MLA kaba la long ha u Rymphang mynta u snem.
U muktiar uba mihkhmat ïa u CEO u la wanrah ïa ka kot (Manual) kaba batai shaphang ka EVM bad VVPAT bad kumno dei ban buh ïa ki bad ban plie ïa ki ha ka por bym don ilekshon bad ha ki por ba donkam kyrkieh.
U la pynpaw ba ïa ka kor thep vote EVM, kaba la don ka jingpan jingpynshai na ki bor pynïaid ilekshon, la buh ha ki kynja miej ha ka Strong Room bad ym shym la buh lang bad kiwei pat ki EVM. Namarkata, u la ong ba kam don jingeh satia ban ithuh ïa kata ka EVM, bad ki kor thep vote bym donkam, lah ban pyllait noh ïa ki.
Hynrei, u muktiar jong u Bah Pangniang, u la ong ba ka don ka Rule 57C kaba kren halor ka rukom buh ïa ki kor thep vote. Katkum kane ka kyndon, la ong ba ïa ka ‘Control Unit’ bad ïa ki ‘Paper Slip’ (VVPAT) dei ban khang bha bad buh ha ki synduk bakyrpang ha kaba u Returning Officer un hap ban shim jingkheiñ.
Namarkata, utei u muktiar u la buh jingkylli ba kumno ka kot (manual) ba la wanrah da u muktiar u CEO ha kaba ïadei bad ka jingbuh ïa ki EVM kan kham long halor ban ïa ki Rule.
Na ka liang u muktiar u CEO u la pan por bad ka High Court ka la aipor lai taïew ïa u ba un lum jingtip bha halor ka rukom buh ïa ki kor thep ‘vote’ bad yn hap ban pyni lang bad ki dur.
