Shillong, Jymmang 24:
U Jordi Alba, uba long u rangïalehkai ‘dien uba la slem bha jong ka Barcelona, u la pynkhreh ban mih noh na kane ka klob ha kaba kut ka aïom hadien 11 tylli ki snem ba u la ïalehkai na kane ka klob.
Kane ka jingpynbna ka la wan lyngba ka Barcelona ha ka Sngi Balang, ha kaba ka la pyntikna ba ka la mynjur ban pynkut noh ïa ka kontrak hapdeng ka klob bad u Alba. Kane ka kontrak ka la dei ban kut ha kaba kut jong ka aïom ïalehkai 2023-24.
Haba pynpaw halor kane ka bynta, ka Barcelona ka la ong, “Ka Barcelona ka la ai khublei ïa u Jordi Alba halor ka jingtbit ka jong u ha ka kam ïalehkai, ka jingshim khia ha ka kam ïalehkai.”
Naduh ba u la mih na ka Valencia ban pynïasoh sha ka Barcelona naduh u snem 2012, u Alba u la nang ïai kiew shaphrang ha ka kam ïalehkai ha kaba u la ïadon bynta ban pynurlong ïa ka klob ban khur ïa ka nam lahduh haduh hynriew sien ha ka La Liga bad shisien ha ka Champions League. Haba kheiñ kyllum ki long haduh 19 tylli ki trophy kiba kane ka kynhun ba khlaiñ bor ka la khur ïa ka jingjop ha ka por jong u.
Hynrei une u rangïalehkai ‘dien ba la 34 snem ka rta na Spain u la shah knieh noh ïa ka jaka ïalehkai (position) ka jong u ha u rangïalehkai ba dang khynnah u Alejandro Balde ha kane ka aïom.
Ym lah ban len ba u Alba u la noh synñiang ïa kane ka klob ha kaba u la ïoh ban ïalehkai haduh 450, ha kaba u la ïoh ban thep 27 kol bad ïarap pynbuh 91 sien.
Haba pynpaw halor kane ka jingkut noh ka jingïaid lynti bad ka Barcelona, u Alba u la pynpaw, “Ka long ka jingïaid lynti kaba pynsah kynmaw ha ryngkat ka jingkyrshan na ki paidbah. Ka Barcelona ka long borabor ka jaka kaba kyrpang ha ka mynsiem ka jong nga.”
Ka jingmih noh u Alba ka long ka jingbud ïa ki dienjat u kapten ka kynhun u Sergio Busquets, ha kaba yn sa ai khublei khatduh da kane ka klob ha ka aïom lyiur. Kine baroh ar ngut kin ïalehkai khatduh ha la ïing ha Camp Nou pyrshah ïa ka Real Mallorca ha ka Sngi U Blei bad kane kan long ka kabu ksiar ïa ki paidbah nongkyrshan ba kin ai khublei khatduh ïa ki.
U Alba u la ong, “Kine ki long ki por kiba eh, hynrei nga kyrmen skhem ba kine ki long kiba kongsan eh na ka bynta jong nga ba nga kyrshah ïa ka klob. Nga kwah ban ïohi ba ka Barcelona kan nang ïai kiew shaphrang watla hadien ba nga la mih.”
