Shillong, Jymmang 24:
Hadien ar sngi ba la ïaid ka jingshah thngan, u President ka VPP, Bah Ardent Basaïawmoit u dang khlaiñ ka met ka phad namar ki doktor ki la la peit bniah biang mynne janmiet mar shu kem dum jong ka Sngi Balang.
U Bah Ardent u la sdang shong shah thngan naduh 10 baje mynstep ka 23 tarik Jymmang kaba dang bteng haduh mynta ka sngi ka 24 tarik jymmang ban pynbor ïa ka sorkar ban pynkylla noh ïa ka bhah thungkam thungjam ban ai bhah khambun ïa ki Khasi namar ki la bun paid U Bah Ardent uba la shong shah thngan nyngkong hakhmat Secretariat, hynrei ha ka por 10 baje janmiet jong ka 23 tarik Jymmang u la wan shong noh ha jaka ïeng jaka hajan Additional Secretariat kaba la shna kyrpang ban lait na u slap.
Haba ïakren bad u Bah Ardent u la pynpaw ba u dang khlaiñ hadien ba u la shong shah thngan la ar sngi.
U la ïathuh ba haduh mynta ka sorkar kam pat pyni dak eiei halor ka jingdawa ka seng VPP.
Katba u MLA ka VPP na Mawryngkneng, Bah Heavingstone Kharpran, u la ong ba ka seng kan sa shong pyrkhat lada ka sorkar kam sngap ïa ka jingshong shah thngan ba marwei u President ka VPP, Bah ardent Basaïawmoit.
U la ong ba ma u ryngkat ki nongkitkam kin kyrshan ïa u Bah Ardent katba u dang shong shah thngan hakhmat Additional Secretariat.
Katba dang ïaid ki kynta shah thngan, kawei ka longkmie bad uwei u samla ki la leit ban pynlong jingduwai ïa u Bah Ardent Basaïawmoit katba u dang shong shah thngan ha katei ka jaka.
Ha kane ka jingduwai kine ar ngut ki la bat ïa ka kti u Bah Ardent, hynrei ka longkmie kaba bat na kti kadiang katba dang duwai ka la jaw ummat.
Kane ka jingduwai ka long ban ai mynsiem ïa u Bah Ardent ba un dang ïoh bor haba u dang shong shah thngan.
Ki nongkitkam jong ka seng VPP ki la hap ban shna pynheh biang ïa ka rynsan kaba shong shah thngan u Bah Ardent namar kiba bun na ki ‘riew paidbah ki la wan tuid ban ai jingkyrshan ha Additional Secretariat.
Namar ka jingkhapngiah haba la bun kiba wan shong pynshngaiñ, la shna pynheh biang ïa ka rynsan naduh 4 baje janmiet da kaba buh tang ki shuki ban ïoh shong ki paidbah khnang ban lait na jingpynwit u slap.
Ha ka por janmiet ki paidbah kiba kynthup naduh ki tymmen bad samla ki la tuid ban leit ai mynsiem ïa u Bah Ardent Basaïawmoit haduh 10 baje janmiet.
Kine kiba wan ai mynsiem ki don kiba shong ha shuki ba la buh kyrpang bad kiba ïeng ha syndah ka rynsan ba shong Bah Ardent kat haduh ba ki pulit ki hap ban wan pynïaid ïa ki kali namar ka jingdheng kali ha katei ka jaka na ka jingwan tuid kiba wan ai mynsiem.
