Nongstoiñ, Jymmang 24:
Ka jingïap jong ki sniang na ka jingpang African Swine Fever ka la saphriang mynta sa ha ki katto katne ki bynta jong ka West Khasi Hills District. Kane ka jingpang (African Swine Fever) ka la wan jia ha kawei na ki shnong hapoh Nongstoiñ ha kaba ki sniang jong uwei u nongri ki la ïap lut baroh khoit na ka daw jong katei ka jingpang.
Katkum ka jingïathuh jong u Dr. P Sohlang, ophisar ka tnat A.H & Veterinary u la ong ba katkum ka kaiphod ba la ïoh la ong ba katei ka jingjia ka la jia hapoh ka shnong Tiehsaw, Nongstoiñ bad haduh mynta ki sniang kiba la ïap ki don haduh 22 tylli.
Nangta shuh u Dr. Sohlang u la ong ruh ba kitei ki 22 tylli ki sniang kiba la ïap ki dei hi jong utei u rangbah. Katba na ka liang jong ka tnat ka la bthah ïa utei u rangbah ba un pynkhuid bad sait bha noh ïa ka sem ha ka rukom kaba dei katkum ka jingbthah na ka tnat.
U Dr. Sohlang u la ong ruh ba haduh mynta ym shym pat la don ka dawai ban pynkoit ïa katei ka jingpang. Kumta ka lad jingïada ka dei beit tang ban phikir ban kiar na ka jingpynïakynduh sniang thymmai lane ban wan briew ha ki sem sniang.
Namar kata, na ka liang jong u Dr. Sohlang u la kyntu ïa ki paidbah ba kin kiar ban bam ïa ka doh sniang kiba la ïap na ki jingpang. U la ong ruh ba lada bam ïa ka doh sniang ba thied na ïew ruh dei ban da shet bha namar ym tip ba ka doh sniang kaba wan naei.
Nalor kata, u la pyntip da kaba ong ba haduh mynta ym shym pat la lap ba ka jingpang African Swine Fever kan ktah ne bit ïa ki briew, hynrei wat la katta ruh ki briew ki dei ban long kiba phikir.
Ha kaba ïadei bad kane ka bynta na ka liang jong u Deputy Commissioner ka WKHD, u la phah pyrkhing bha ïa katei ka shnong da kaba pynjari ruh da ka kyndon 144 CrPC khnang ba kan nym don ka jingsaphriang sha kiwei pat ki bynta.
Shuh shuh la ong ruh ba na ka liang u District Magistrate u la pynbna ruh ïa katei ka jaka kum ka ‘Surveillance Zone’ tat haduh ban da pynbna da kumwei pat.
