Ka Hynñiewtrep Youths’ Council (HYC) kaba la pyndonkam da ka bor jong ka RTI Act, 2005, ka la sei madan ïa ka jingpynlut phut ka sorkar MDA I kaba la kot shaduh ka T. 4 klur tam ha ki san snem tang ban siew tulop ïa ki Chairman, Co-Chairman, Vice-Chairman, Deputy Chairman bad ki dkhot jong ka Meghalaya Economic Development Council (MEDC) bad ka Meghalaya Resource and Employment Generation Council (MREGC). Kine ki dei tang jong artylli ki tnat kiba hap ha ka Planning Department. Ki dang don shuh sa bun bah ki Council, Commission, Board kiba ka sorkar ka la thung da ki briew kiba la rem ha ka ilekshon lane kiba don jingïadei bad ki seng saiñpyrthei ba ïatreilang ha ka sorkar bad kumta ter-ter. Ka HYC ka la lap ruh ba ka sorkar jylla ka la pynlehnohei ïa ka pisa da kaba siew tulop haduh T. 1,55,02,266 ïa ki dkhot hapoh ka MEDC bad na ka MREGC la siew tulop kumba T. 2,87,18,941. Hynrei kaba lyngngoh ka long ba kitei ki Council kim ju pynlong satia ïa ki jingïalang ha ki 5 snem ba la leit naduh ba la thaw ïa ka sorkar Meghalaya Democratic Alliance-1.
Kane ka long kum ka jinglute ïa ka spah ka phew jong ki paidbah ka jylla jong ngi. Nalor ba ka dei ka jylla kaba duk kaba hap ban shim bun bah ka ram, ka sorkar ka dang don por ban pynlut ha ki kam ki bym wanrah jingmyntoi eiei ïa ki paidbah ba bun ba lang. Kiba ïoh jingmyntoi ki dei beit thik tang kito kiba bat ïa ki kam. Lada dei pynban ba ki trei bad ka kam, ngim sngewpher lada ki shim ïa ka jingsiew. Haba trei, hap ban ïoh bad ka jingsiew. Tangba lada khlem trei eiei, kumno ka sorkar kan shu siew. Imat dei tang ha ka kam sorkar ba ki don kiba ïoh jingsiew khlem da donkam ban trei eiei wat tang shi sngi ruh ha ki san snem. Ban da dei ha ki kam jong ki riew shimet, kin bun ki ban shah beh syndon bad kin hap ban leit wad kam shawei.
Dei ha kine ki rukom – bam hati kit kulai – ba ka jylla jong ngi ka nang hiar arsut ha ka jaka ba kan kiew arted. Ha ka jingshisha, ka sorkar ka la dei ban pynduh pyndam lut ïa kito ki Council, Commission, Board ki bym ai jingmyntoi bad ïa ki nongtrei hangto, dei ban pynshongthait hadien ba la siew lut sha ki ïa ki jingïoh kiba ki dei hok ban ïoh. Ha ka jaka ba ka sorkar kan ai kam ïa ki samla samhoi kiba la lah ban pyndep ïa ki jingpule ha ki kyrdan bapher-bapher, ka pynlut sngi pynban ban ai kam ïa ki briew kiba la rem ilekshon lane kiba don ha kajuh ka seng saiñpyrthei. Tangba ngi dei ban kynmaw ba kane ka jingleh kam dei kaba dang mynta mynne, hynrei kaba la ïaid la bun phew snem. Ka jingdonkam ban ai shuki ïa kiba la rem ilekshon bad ïa kiba dei na kijuh ki seng saiñpyrthei ka dei namar ki nongïalam ki sngewsynei ïa ki lane ki sngew ba dei ban ai khusnam haba ki la ïadonlang ha kajuh ka sem. Kaba kum kane ka saiñpyrkhat, kan ïalam ïa ngi sha khlaw jong ka jingdap ram.
Ha ka jaka ba ka sorkar kan pynlut ha ki kam kiba seisoh bad ki ban wanrah jingmyntoi, ka lapmiet ban siew sha la ki paralok saiñpyrthei. Ka sorkar kam dei tang na ka bynta ki paralok. Kat katne ka hiran bad ka jynjar kaba wan tyllep ïa ka jylla jong ngi, ka sorkar ka leh matlah. Ha ka jingshisha, ka dei ban pynsangeh ïa ka jingthung kam ïa kiba la rem ilekshon lane ïa kiba don jingïadei bad ka. Ïa ka pisa kaba dei ban leit sha kita ki Council, Commission lane Board, dei ban pyndonkam na ka bynta kiwei pat ki jait kam kiba lah ban ai jingmyntoi ïa ki paidbah. Ki nonghikai ki ju ud ba kim ju ïoh tulop ha ka por kaba biang. Ha ka jingshisha, kita ki nonghikai ki dei ban dawa na ka sorkar ban pynduh noh ïa kine ki Council, Commission bad Board bad ban pynlang ïa ka pisa kaba dei ban leit sha ki ha ka por kaba dei. Nalor ki nonghikai, ki don bun sa kiwei pat kiba trei bad ka sorkar ki bym ju ïoh tulop ha ka por kaba biang bad ki hap ban ap da ki bnai bad ki snem kaba long pyrshah ïa ka hok longbriew manbriew.
