Shillong, Jymmang 24:
Ki nongkitkam ka seng Voice of the People Party (VPP) ki la ong ba ka jingshong shah thngan jong u President rangbah jong ki, u Bah Ardent Miller Basaïawmoit, kam dei na ka bynta jongno-jongno, hynrei ka dei na ka bynta ka jingmyntoi lang jong ki khun samla ka bri u Hynñiewtrep.
Kum ban shu kdew, u Bah Ardent u la sdang ïa ka jingshah thngan kaba khlem buh por naduh ka step jong ka 23 tarik Jymmang 2023 hadien ka jingleh mynthi bad ka jingleh kuman jong ka sorkar Meghalaya Democratic Alliance (MDA-2.0) hapoh ka jingïalam jong u Conrad K Sangma kum u Myntri Rangbah ban pynbeit ïa ka bhah thungkam thungjam lane ka Reservation Policy bad ban pynsangeh ïa ka jingpyntreikam ïa ka Roster System.
Haba ïoh ban ïakren bad u President ka VPP na 17-North Shillong ha ka Sngi Balang kaba dei ka sngi ba ar ka jingshah thngan jong u Bah Ardent, u Bah Strong Kharjana u la pyntip ba tat haduh katei ka sngi na ka liang ka sorkar kam pat shym lah ong eiei ne kren eiei halor kane bad na ka liang ka seng ka dap ruh da ka jingsngewkhia halor kane ka jingbym shimkhia jong ka sorkar watla ka dei ka mat kaba donkam ban ïakren bad phylliew ha ka rukom kaba dei na ka bynta ka bit ka biang jong baroh.
“Ngi da sngewkhia haduh katta katta namar kane ka dei ka mat kaba kum ka jaitbynriew ka donkam shisha ban ïakren bad ïaphylliew ha ka rukom kaba dei na ka bynta ka jingïabit ïa biang lang jong baroh,” la ong u Bah Kharjana.
U Bah Kharjana u la ong ruh ba kane ka mat ka dei ka mat jong ka jylla bad kam dei ka mat jongno-jongno ne jong ka seng. Kum ka seng ka ngeit skhem ba ha kine ki ban sa bud, ka seng kan ïoh ïa ka jubab na ka sorkar bad ka seng ka ngeit skhem ruh ba ka jubab ka dei ban long kaba bha namar kane ka dei ka mat kaba la ïakhih naduh ki por kiba mynshwa.
Na ka liang u Bah Dr Ricky AJ Syngkon uba dei u General Secretary ka VPP u la pyntip ba u Bah Ardent u don ha ka met ka phad kaba koit ba khiah bad kam don kano kano ka jingduna ha kano kano ka bynta.
U Bah Syngkon u la ïathuh ba ka sorkar kam pat ong eiei sha ka seng bad u la ong ba naduh kaba sdang hi, ka seng ka la ïa shim ïa ka rai ba kane ka jingïakhih kan ïai bteng haduh ban da ïoh ïa ka jingjop.
“Namar na ka liang ka jong ngi, ngi long kiba neh ha kata ka jingmut bad ngi dawa ïa ka sorkar ba kan leh eiei halor ka Reservation Policy,” la ong u Dr Syngkon.
Haba kylli la hato kin sa dang sa mano mano napoh ka seng ki ban sa ïa mih ban shah thngan lang bad u Bah Ardent, u Dr Syngkon u la ong ba halor kata na ka liang ka seng kan sa rai namar kata ka dei ka rai jong ka seng bad ka seng kan sa peit ïa kaei ka ban sa mih hadien.
“Lada ka sorkar kam sngewthuh ïa ka jingdonkam ban pynbeit ïa ka Reservation Policy ka long kaba eh namar ban kren ïa ka Roster System khlem da ktah ïa ka Reservation Policy kam don jingmyntoi,” la ong u Dr Syngkon.
