Shillong, Jymmang 24:
Ka Khun Hynñiewtrep National Awakening Movement (KHNAM) ka la ong ba ka kyrshan pura ïa ka jingïakhih jong ka Voice of the People Party (VPP) hapoh ka jingïalam u Bah Ardent Miller Basaïawmoit ban pynbor ïa ka Sorkar Jylla ban khmih bniah ïa ka bhah thung kam ne ka ‘Reservation Policy’.
“Kano-kano ka lynti kaba shim da u Bah Ardent, ngin kyrshan beit 100%,” la ong u Vice-President ka KHNAM, Bah Thomas Passah ha ka Sngi Balang.
U la ong ruh ba ka seng ka long kaba kloi ban ai ka kti kamon kti kadiang ïa utei u nongïalam khnang ban pynbor ïa ka Sorkar ban khmih bniah ïa ka bhah thung kam.
Haba pynpaw ka jinglyngngoh halor ka jingpyneh ka Sorkar ban ïakren halor katei ka bynta, u Bah Passah u la ong ba ka daw “lehse ka dei namarba u Myntri Rangbah u dei u Garo bad ka seng kaba ïalam ïa ka Sorkar mynta ruh ka dei ka seng na Ri-lum Garo bad kumta u (Myntri Rangbah) kwah ban wanrah jingmyntoi tang ïa ki Garo.”
“Kane ka long kaba bakla, ka Jylla ka don lang ki Khasi. Ngim kwah ïoh Myntri Rangbah u ban ïa shah jaidbynriew namar u dei u Myntri Rangbah jong ka Jylla,” u la ong.
Ha kajuh ka por, u la ong ba u Myntri Rangbah u dei ban wanrah ïa ka jingsynshar ka bym shah liang.
Haba kren halor ka ‘Reservation Policy’, utei u nongïalam u la ong ba ha u snem 1972 ka la don ka rai kaba kdew ba hadien 15 snem dei ban khmih bniah ïa ka bhah thung kam hynrei ym shym la leh ïa kane.
“Ki nongmihkhmat ruh kim shym la leh eiei, mynta la 51 snem…ka la biang eh ban khmih bniah ïa ka bhah thung kam,” u la ong.
Shuh shuh haba ban biang ba ka seng ka kyrshan ïa ka jingïakhih ka VPP hapoh ka jingïalam u Bah Ardent da ka jingthmu ban pynbor ïa ka Sorkar Jylla ban khmih bniah ïa ka bhah thung kam, u Bah Passah u la bynrap, “Na ka liang jong ngi, ngi kwah ba u paidbah un ïatyllilang ha kawei ka shatri hapoh ka jinglamkhmat jong u Bah Ardent.”
