Taiwan, Jymmang:
Katkum ki khubor la ong ba uwei u nong Taiwan 18 snem ka rta, uba long ruh u nongioh pateng ia ki million dollar ka spah ka phew jong kawei ka longiing, u la khlad noh tang hadien 2 kynta ba u la iashongkha bad uwei pat u briew uba u dang shu iakynduh shen. La ong ba u Lai, u la ioh pateng ia ki jingdon jing-em u kpa jong u kiba la kot ia ka NT$500 M (Rs. Rs 1,34,96,95,476) hashwa ba u kpa jong u- un khlad noh na ka pyrthei.
Katkum ba la ioh jingtip, la ong ba ia utei u khynnah pule uba dang 18 snem ka rta, la lap napoh ka jaka sah jong u hi, na ka mala kaba 10 ha ka 4 tarik jong une u Jymmang. La ong ba u nongbud jong u ruh u sah lang ha katei hi kajuh ka ïingmala. Ia utei u nongbud la tip kyrteng u Hsia bad la ong ba u Lai bad u Hsia, ki dang shu dep iathoh dang ha ki 2 kynta hashwa ba utei u khynnah un khlad noh ha katei ka sngi.
U Hsia bad u kpa jong u, ki long ki nongbud bad nongkyrshan ba hajan eh jong u kpa u Lai bad kiba la iarap ban pyniaid ia ki kam- ki jam jong u kpa mynba u dang im. Ia ka jingiap jong u Lai, la bna paidbah ha ka 19 tarik hadien ba ka kmie jong u, ia kaba la ithuh kum ka Chen, ha ryngkat bad u nongïasaid aiñ jongka, ha ka jingialang bad ki lad pathai khubor, ka la kynnoh ba katei ka long tang ka kam thombor kaba la suhbuit sop-sop da ki nongbud jong utei u khynnah hi bad kumta ruh ka kmie jong u Lai ka la dawa ia ki tnat ba dei khmih ba kin wad bniah ia ka daw jong ka jingiap u khun jongka tang hadien 2 kynta ba u dang dep ban iathoh shongkurim bad utei uwei pat. Shuh shuh ruh ka Chen ka la iathuh ba katei ka long tang ka khubor lamler ba u khun jongka u la shongkurim ia utei uwei pat u briew namar baroh ka long tang ka jingthmu ban ioh tuh ia katei ka pisa kaba u khun jongka u la ioh pateng na u kpa shwa ban iap. Nalor kata ruh ka la ong ba u khun jongka um dei u longkynthei- shynrang ‘Gay’ hynrei baroh ka dei tang ka jingthaw buit jong kiba ban lute ia katei ka pisa bad ka jingdon- jing-em jong u baroh. Namar ka la iathuh ruh ba u Lai um shym la iathoh ne shongkurim ia u Hsai bad u Lai u dang kynduh dang 2 sien ruh ia u Hsai, ha kaba ka sien ba nyngkong ka dei ha ka sngi ba pyndon burom khatduh ia ka met u kpa jong u.
Namarkata ka Chen ka la ong ba kam lah ban pdiang da lei-lei ruh ia katei ka khubor lamler halor ka jingiap u khun jongka namar baroh ka dei tang ka jingsuh buitjongno re jongno tang ban ioh ia ki jingdon- jing-em jong u baroh.
Katkum ka kaiphod ba la ioh na ka test ba la peit bniah ia ka met jong utei u khynnah, la shem ba ki don ki jingmynsaw bajur shapoh jong ka met bad la ikop kumba u la shah pynhap nalor katei ka 10 mala bad u lah ruh ban shah pyndih ia ki kynja jingdih kiba long bih hashwa ba un hap noh syndon nalor katei ka iing mala.
