Shillong, Jymmang 24:
Ki paidbah kiba la wan ai jingkyrshan ïa u President ka Voice of the People Party (VPP), u Bah Ardent Miller Basaïawmoit, ha ka sngi ba ar ka jingshong shah thngan jong u ha ka jaka ïeng kali hajan ka Additional Secretariat ki la pynpaw ïa ka jingsngewkhia hadien ka jingleh kuman bad ka jingleh mynthi jong ka sorkar ban pynbeit ïa ka bhah thungkam thungjam bad ban pynsangeh ïa ka jingpyntreikam ïa ka Roster System.
Haba ïoh ban ïakren bad ki katto katne ngut ki ’riew paidbah kiba la wan ha katei ka sngi, ki la pynpaw ba kum ki paidbah ki wan ban ai jingkyrshan ïa u Bah Ardent namar ba u dei tang u Bah Ardent uba la rah ïa kane ka mat ban ïakren katba kiwei ki MLA ki la shu sngap mynthi khlem kren ne ong eiei ha kaba ïadei bad kane ka mat.
Kitei ki paidbah ki la ong ba ka jingmih jong u Bah Ardent shakhmat ban pynkhih ïa ka bhah thungkam thungjam kaba la noh tarajur sha kawei ka jaitbynriew ka dei ka jubab jong u Blei.
“Lada ngim wan kyrshan sa ma ngi, ka Ri jong ngi kan long kumno bad ka Jaitbynriew kan long kumno? Ka lawei ki khun ki kti jong ngi kan long kumno bad kin poi shaei? Namarkata, ka mynsiem jong ngi kam shah ban shu shong ha ïing hynrei da kumno kumno ngi dei ban mih ban ai jingkyrshan,” la pynpaw kitei ki ’riew paidbah.
Kitei ki paidbah ki la ong ba dei tang u Bah Ardent uba la mih napoh ka Jaitbynriew ban kit ban bah ïa ka lawei jong ki khun ki kti bad jong ki samla ki ban sa wan, hynrei lym kumta ka Jaitbynriew kan sa ngam jyllop.
Shuh shuh kitei ki paidbah ki la kyntu ruh ïa ka sorkar ba ka dei ban shimkhia halor kane ka khia ka shon jong ka Jaitbynriew bad ba ka dei ban pynbeit ïa kane ka bhah thungkam thungjam bad ka Roster System. Ki la ong ruh ba ki MLA Khasi ki dei ban kyndit bynriew ban kyrshan ïa u Bah Ardent halor kane ka jingdawa ym ba kin shu sngap mynthi bad ban kdup ïa ka shuki bad ïa ka spah ka phew.
Kitei ki paidbah ki la ong ba ki VPP ki la leit ban ïakynduh ïa ka sorkar, hynrei ka sorkar ka la kren khlieh-khlieh bad tdong-tdong bad ki la kren da kumwei bad ai jubab da kumwei. Kumta ki la kyntu ïa ka sorkar ba ka dei ban shimkhia ïa kane bad ka dei ban pynbeit ïa ka Reservation Policy bad ka Roster System.
“Namar ki ieid ïa la shuki bad ki ieid ïa ka spah ka phew bad ki ieid ïa kata ka khlur ka tyngka kaba la pynbiej ïa ki. Kine ki MLA Khasi jong ngi ki dei ban mih shisyndon bad ban kyrshan bad ban kyndit bynriew da kaba ai jingkyrshan ïa u Bah Ardent namar ngi te ngi kynnoh beit ba ki dei ki jong ngi,” la ong kitei ki paidbah.
Kitei ki paidbah ki kyrmen skhem ruh ba u Blei un nang ïai ai bor ïa u Bah Ardent ba un lah ban ïeng haduh kaba kut khnang ba ka ri kan ïoh ïa u soh bad ïa ka lawei kaba phyrnai.
“Lada ngi peit ïa u Bah Ardent, ngi ïoh bor bad ngi ïoh mynsiem kum ki tymmen ban wan hangne ban ai jingkyrshan ïa i. Kine ki MLA Khasi jong ngi ki la shu thiah lyngngai ha ka spah jong ki bad kim tip shuh ïa ka lawei ki khun ki kti bad ngi ngeit skhem ba u Blei ha kawei ka sngi un sa bishar ïa ki bad ka jingbishar kaba u Blei un ai ïa ki kan long ba kin nym ïoh thiah hynrei kin lynga bad pisa haduh ba kin nym ïoh jingsuk bad ka spah ka phew ka jong ki kan leit kum ka umsaw kumba ki la pyndik katne katne ïa u paidbah,” la ong kitei ki paidbah.
