Gangtok, Jymmang:
Ka ‘high-level committee’, kaba la thaw da ka Sorkar jong ka jylla Sikkim ban khmih bniah bin pa bin halor ki mat kiba ïadei bad ka jingpyrshang ban pyntreikam ïa ka Inner Line Permit (ILP) ha ka jylla, ha ka Sngi Ba-ar mynta ka taiew ka la lah ban leit ai ïa ka kaiphod ka jong ka sha u Chief Secretary jong ka jylla – VB Pathak.
Ha ka sngi ba ka komiti ka la leit ban ai ïa ka kaiphod la ïadon lang ruh da u Director General of Police (DGP) jong ka jylla – AK Singh.
Ïa katei ka komiti la ïalam khmat da u Santa Pradhan kum u chairman jong ka komiti. Kiwei kiwei ki dkhot jong ka komiti ki kynthup ïa u TN Dhakal, MP Subba, Sarala Rai, YP Gurung, SD Tshering, PG Sherpa, Tashi Cho Cho bad u T Gyachho.
Na ka liang katei ka komiti ka la khmih bad bishar bniah halor ki mat kiba ïadei bad ka jingpyntreikam ïa ka ILP ha ka jylla Sikkim bad kumno kan lah ban ktah ïa kiwei kiwei pat ki jylla jong ka Thaiñ Shatei Lam Mihngi jong ka ri India. Katei ka komiti ka la leit ban aiti ïa ka kaiphod kat kum ka jinglap jingshem jong ka na ki jingkhmih bad jingwad bniah kiba ka la dep ban lum thup ha ki khyndiat bnai kiba la leit noh.
Shuh shuh la ïathuh ba na ka liang katei ka komiti ka la leit ruh ban jngoh ïa ka jylla Arunachal Pradesh, Manipur, Mizoram bad Nagaland, kiba dei ki jylla jong ka Thaiñ Shatei Lam Mihngi kiba la pyntreikam ïa ka ILP.
