Kuala Lumpur, Jymmang:
Ha ka lympung ialehkai Badminton kaba lah nang iaid mynta shakhmat ha ka ri Malaysia ka Malaysia Masters Super 500, ka khubor ba lah ioh lum ka iathuh ba ki khlur ialehkai ka ri ba kynthup ia u Kidambi Srikanth bad ka P V Sindhu ki lah jam sha ka kylla iakhun kaba ar.
Kumta ha kaba iadei bad ka jingkhur jingjop jong ki arngut ka long ba u Srikanth da kaba suk u la lah ban jam sha katei kawei pat ka kylla iakhun da kaba jop pyrshah ia u rangiakhun pyrshah na France u Toma Junior Popov da 21-12, 21-16 ha ka jingiakhun paramarwei ki shynrang. Ha kawei pat ka liang, ka Sindhu ka lah mad ia ka jingeh jong ka ha ka jingiakhun kaba ar pyrshah bad ka nongialehkai na Denmark ka Line Christophersen, hynrei kaba lah iakhun da kaba tyngeh na ka bynta ban pyndep ia ka jngialehkai da kaba khur noh shalde ia ka jingjop da 21-13, 17-21, 21-18. Haba phai pat sha kiwei ki jingiakhun, ka Ashmita Chaliha ka lah mad noh ia ka jingshah pynliem ka jong ka ha ka Han Yue na China ha baroh shi lynter ki jingialehkai jong ka kylla iakhun ba nyngkong da 21-17, 21-17. Kumjuh ruh ka Aakarshi Kashyap ka lah mad ia katei kajuh ka jingeh halor ka jingshah pynrem ka jong ka ha ka lahduh ha ka pyrthei ka Akane Yamaguchi ha baroh shi lynter jong ki jingiakhun da 21-17, 21-12.
Shuh shuh kiwei pat ki nongialehkai kiba kynthup ia u Prannoy un ialeh na ka bynta ka jingpynbha ka rukom ialehkai jong u hadien ka jingshah rem noh ha u Chou Tien Chen na Chinese Taipei, ynda kitei ki arngut kin iakynduh biang mynta ha ka kylla iakhun kaba nyngkong katba u Lakshya Sen pat un iakynduh bad u Loh Kean Yew. Katkum ka khubor ba lah ioh lum ka iathuh ba katei ka lympung ialehkai ba mynta ka long ruh ka shi bynta jong ka jingiamareh thong na ka bynta ban shah jied sha ka lympung ialehkai Olympic 2024 ha Paris lyngba ka BWF Olympic Qualification.
