Guwahati, Jymmang:
Ki bor sorkar jong ka jylla Assam ha ki khyndiat sngi kiba la leit noh ki la pynbna U Myntri ka Tnat Korbar Ri jong ka Sorkar Pdeng – Amit Shah un sa wan ban jngoh ïa ka jylla Assam ha ka 25 tarik mynta u bnai (mynta ka sngi) bad ha katei ka jingwan jngoh ka jong u, u Myntri un sa leit ban ïashim bynta ha bun tylli ki prokram kiba ïadei bad ki sienjam ban kyntiew ïa ka roi ka par jong ka jylla.
Halor katei ka jingwan jngoh jong u Amit Shah, na ka liang u Myntri Rangbah ka Assam – Himanta Biswa Sarma ha ka 23 tarik mynta u bnai ha ka jingïalang bad ki lad pathai khubor u la pynbna ïa ki prokram kiba u Amit Shah un sa ïashim bynta.
Katto katne na ki prokram kiba u Amit un sa leit ban ïashim bynta ki kynthup ïa ka jingplie ïa u mawnongrim na ka bynta ban tei ïa ka National Forensic Sciences University (NFSU) ha ka shnong Changsari; ka jingsam ïa ki shithi thung kam sha ki 44,703 ngut ki nongshong shnong jong ka jylla Assam bad kiwei kiwei.
Ha ka jingïalang bad ki lad pathai khubor na ka liang u Myntri Rangbah ka Assam u la pyntip ba ka sorkar jylla ha ki bnai kiba la dep ka la lah ban thung kam ïa haduh 41,920 ngut ki nongshong shnong jong ka jylla bad u la pyntip ruh ba ka sorkar kan sa thaw sa ïa 22,776 tylli ki kam kiba lait. U la pyntip shuh shuh ba ki kyrtong wad kam kiba lah ban pass ïa ki eksam, kin ïoh ïa ki kam hapdeng ka 1 tarik bad 15 tarik jong u bnai u ban sa wan.
Haba phai sha kawei pat ka khubor la ïathuh ba na ka liang ka sorkar Assam ka la shim ïa ki sienjam ban pynkhreh na ka bynta ka jingpdiang burom ïa u Amit Shah. La ïoh jingtip ruh ba ka sorkar ka la shim ïa ki lad ki lynti ban pynjur ïa ki kam pahara ha ka nongbah Guwahati khnang ban ïada na kino kino ki jingjia kiba lah ban pynthut ïa ka jingwan jngoh jong u Myntri.
Shuh shuh na ka liang ki bor pynïaid distrik jong ka Kamrup (Metropolitan), kynthup ïa ka nongbah Guwahati ki la pynmih da ka hukum ba yn ym shah ïa kino kino ki briew ba kin pynher ïa ki ‘drone’ ha ka 25 tarik mynta u bnai.
La ïoh jingtip ba na ka liang u District Magistrate ka Kamrup (Metropolitan) – Pallav Gopal Jha ha ka Sngi Ba-ar mynta ka taiew u la pynmih da ka hukum ban khang pyrshah ïa ka jingpynher ïa ki ‘drone’ naduh ka 24 tarik tad haduh ka 25 tarik mynta u bnai.
