Itanagar, Jymmang:
Ka Arunachal Pradesh Youth Congress (APYC) ha kane ka taiew kaba mynta ka la dawa na ka sorkar jylla ba ka dei ban pyllait noh ïa ki 36 ngut ki briew kiba la shah kem bad shah pynngat hapoh ki kyndon jong ka Arunachal Pradesh Unlawful Activity Prevention Act (APUAPA), 2014 na ka daw jong ka jingdonkti jong ki ban leit ïashim bynta ha ka pakhang shnong kaba dang shu dep ban pynlong ha ka jylla Arunachal Pradesh.
Na ka liang ka APYC ka la byrngem euh ba kan sa pynlong da ka jingïakhih kaba jur lada ka sorkar kam lah ban pyllait noh ïa kitei ki 36 ngut hapoh ki 5 sngi.
Ha ka shithi ba ka APYC ka la leit ban ai sha u Myntri ka tnat Kam Pohïing jong ka jylla – Bamang Felix, ka la seng ka la pyntip ruh halor bun tylli ki mat jingdawa, kynthup ïa ka mat kaba ïadei bad ka jinglait tuh jong ki jingkylli eksam kam ba la pynlong da ka Arunachal Pradesh Public Service Commission (APPSC).
Na ka liang ka seng ka la pyntip shuh shuh ba ki nongshong shnong ka jylla Arunachal Pradesh ki la don hapdeng ka jingkhim jingmut hadien ka jingshah kem jong ki 36 ngut kiba la leit ban ïashim bynta ha ka pakhang shnong.
Na ka liang ka APYC ka la kynnoh ruh ba ka ka jingshah kem jong kitei ki 36 ngut ka dei na ka daw jong ka jingbymlah jong ka sorkar jylla ban pynurlong ïa 13 tylli ki mat jingdawa ba la wanrah shakhmat da ka Pan Arunachal Joint Steering Committee (PAJSC) – ïa kiba la kular bad mynjur ruh da u Myntri Rangbah jong ka jylla – Pema Khandu ha ka jingïalang ba la pynlong ha ka 18 tarik u bnai Rymphang.
Na ka liang ka APYC ka la pyntip ba ka jingshah kem jong ki 36 ngut bad ka jingshah pynrung ïa 12 tylli ki mokotduma hapoh ka APUAPA ka la wanrah ïa ka jingpynrem bad jingkyntoh kiba jur na ka liang ki nongshong shnong jong ka jylla. Ka APYC ka la pyntip ruh ba ka jingpynjlan ïa ka jingshimpor ha ka liang ki kam tohkit na ka 12 sha ka 30 sngi pyrshah ïa kitei ki 36 ngut ka long pyrshah ïa ka hok longbriew manbriew namar ba kitei ki 36 ngut kim dei ki runar kiba donkti ban pynkheiñ ïa ki aiñ sorkar hynrei kiba ïakhih na ka bynta ka bha ka miat jong ka jylla bad kumjuh ruh ban ïada ïa ki hok kiba hapoh ka Article 16(1) jong ka Kontitushon.
Na ka liang u President jong ka APYC – Tarh Jonny u la kyntu ruh ïa u Myntri ka tnat Kam Pohïing jong ka jylla ba u dei ban shim da ki sienjam kiba kyrpang khnang ba yn lah ban pyllait noh ïa kitei ki 36 ngut na ka jingshah set phatok hapoh ki 5 sngi ki ban wan.
