Shillong, Jymmang 24:
Haduh lai ngut ki briew ba kynthup ïa kawei ka longkmie kiba dei ki snar nongkhaïi drok ki la ngat ha kti jong ki pulit. Na ka met jong kitei briew la ïoh ban kurup ïa u drok bad ka pisa nalor kiwei kiwei ki tiar.
Katkum ka kyrwoh ba la pyllait da u Superintendent of Police ka East Jaiñtia Hills la ong, ba ka jingïoh kem noh ïa kitei ki nongkhaïi drok ka la long hadien ba la ïoh ïa ka jingtip kaba bniah. Katei ka longkmie kaba dei ka nongkhaïi drok la tip kyrteng kum ka Maya Gwala bad kaba ju khot sin kum ka Pushki. Ka la phah ïa ki ar ngut kiwei pat ki nongkhaïi ba la tip kyrteng kum u Pasar Uddin ba khot sin u Samir na Emersoan Ghat, Polo, Shillong bad u Dipak Baidya na Polo, hajan ka Tenjing Restaurant ban pynpoi ïa u drok na Silchar sha Shillong ha kawei ka bos ‘night super’ kaba don ïa u number AS01-FC-8199.
La ong ba dei ha ka por 1.30 step phyrngab jong ka sngi Balang, la ïoh ban bat noh ïa kane ka bos ha Umtyra. La ong ruh ba ha ka jingdon lang jong ki nongsakhi na ka liang ki paidbah, la pynlong ka jingtalasi ïa kane ka bos ha ka jingïalam jong kine ki suba bad la lap kawei ka pla ïong, bad lap 9 tylli ki synduk sabon ba la thep bha da u powder ba la suba u drok.
Ha ka por ba leh test ïa une u ‘powder’ la lap ba u dei u drok ‘Heroin’ bad haba la thew, ka jingkhia ka long haduh 100.56 gram.
Shuh shuh haba la pynlong ka jingtohkit, ka kynhun ki pulit na East Jaiñtia Hills ki la wan hiar sha nongbah Shillong, ha kaba ki la rah noh ïa ka Pushki na ka ïingsah jong ka, ha Polo, Shillong da ka jingïarap jong ki pulit ka Pasteur Beat House bad ki pulit ANTF ka East Khasi Hills bad ïalam sha Khliehriat ban kem ha kaba ïadei bad kane ka kam khaïi drok.
Hadien ba la kem, ki pulit ka thanat Khliehriat ki la pynngat noh ha ki kyndon PS Case No. 37(5)2023 U/s 21(b)/29 NDPS Act kaba la dep ban pynrung kyrteng bad ka jingtohkit halor kane ka la ïaid shakhmat ban lap ïa ka jingdonkti jong kiwei pat.
Nalor u drok ba la ïoh kurup uba khia palat 100 gram, ki pulit ki la ïoh ruh ban kurup ka pisa kaba long haduh T.3.34 lak, lai tylli ki mobile phone, kawei ka ATM card bad kawei ka PAN card.
