Dubai, Jymmang:
Hadien ka jingpynthikna khubor ha kaba iadei bad ki 10 tylli ki kynhun ialehkai ki ban sa mih madan ha ka Men’s World Cup Qualifiers ka ban sa long ha Zimbabwe, na ka liang jong ka International Cricket Council (ICC) ka pynbna khubor mynta ia ka prokram ialehkai na ka bynta ki jingia aireng ha katei ka rynsan iakhun ja ka ban sa long ha katei ka ri naduh ka 18 u Jylliew haduh ka 9 tarik u Naitung 2023.
Ka khubor ka iathuh ba ki kynhun iakhun phainal ha katei ka rynsan kin long ki kynhun ki ban jam sha ka ICC Men’s Cricket World Cup 2023 ka ban sa long ha India naduh u bnai Risaw haduh u Naiwieng. Kumta ruh man la ki jingialehkai kin long ki jingiakhun kiba kham eh bad kham shalor hapdeng ki kynhun, ha ryngkat bad ki kynhun ialehkai kin iakhun na ka bynta ki ar tylli ki jaka ha ka ICC Men’s Cricket World Cup 2023 da kaba ai ruh sha ki kynhun ia ka khyndai tylli ki jingpynthikna ki jingialehkai ha katei ka lympung ialehkai Kriket kaba heh ka ban sa long ha India.
Na ka liang jong ka ICC ka iathuh ruh ba ki 10 kynhun ialehkai ki ban shimbynta ha katei ka rynsan iakhun, lah phiah ha ki ar tylli ki group jong mar san tylli ki kynhun ialehkai ha ryngkat bad ka kynhun ialehkai na katei ka ri ban pynlong ia ka rynsan kata ka Zimbabwe, West Indies, Netherlands, Nepal bad USA ki lah shah pynhap ha ka Group A; katba ka Sri Lanka, Ireland, Scotland, Oman bad UAE kin long ki kynhun ha ka Group B.
Shuh shuh ruh man la ki kynhun ialehkai kin ialehkai ia kiwei pat ki kynhun ha ka group ka jong ki tang mar shisien ha ryngkat bad ki lai kynhun ialehkai ha ki lai kyrdan ba shakhmat na man ka group kin jam sha ka rynsan iakhun Super Six bad ha katei ka rynsan, ki kynhun kin ialehkai bad ki kynhun ba kim pat ju iakynduh ha ka rynsan iakhun group ka jong ki.
Ka khubor ka iathuh ruh ba baroh ki dor-thong ba lah khur da ki kynhun ha ka rynsan iakhun group, yn rah ia ki sha ka rynsan Super Six nalor kito ki dor-thong ba ki lah kamai pyrshah ia ki kynhun ki bym shym la lah ban rung sha katei ka rynsan.
Ka Queen’s Sports Club bad ka Bulawayo Athletic Club kiba ha Bulawayo, Harare Sports Club bad Takashinga Cricket Club ha Harare kin iasam mar 34 tylli ki jingialehkai hapdeng ki jong ki, ha ryngkat bad ka Harare Sports Club kan pynlong ia ka jingiakhun phainal ha ka 9 tarik u Naitung. Ka Old Hararians Cricket Club kan sa shim ruh ia ka bynta ban pynlong ia ki prokram jingialehkai-kilan-met.
Ka kynhun ialehkai na Zimbabwe kan pynlong ia ka jingialehkai ha ka sngi plie ia ka lympung kata ha ka 18 tarik u Jylliew ha Harare Sports Club pyrshah ia ka Nepal; kaba don ia ka thong na ka bynta ban shah jied sha ka Men’s Cricket World Cup ha ka sien kaba nyngkongeh jong ka kynhun. Kumjuh ruh ka kynhun lahduh arsien ha ka Men’s Cricket World Cup ka West Indies kan sa mih madan ha ki jingiakhun jong ka ha ka 18 tarik u Jylliew pyrshah ia ka USA ha Takashinga Cricket Club.
Ki jingialehkai jong ki kynhun ka group B kan sdang naduh ka 19 tarik u Jylliew ha Bulawayo, ha kaba ka Sri Lanka kan iakynduh bad ka UAE ha Queen’s Sports Club katba kiwei pat ki jingialehkai ha Bulawayo Athletic Club kin long ka jingiakhun hapdeng ka Ireland bad ka Oman.
Shuh shuh ruh ka Netherlands kan sdang ia ka jingiakhun ba nyngkong pyrshah ia ka Zimbabwe ha ka 20 tarik ha Harare Sports Club katba ka Scotland kan iakynduh bad ka Ireland ha ka 21 tarik ha Bulawayo kata ha Queens Sports Club. Ka rynsan iakhun Super Six pat kan sdang ha ka 29 tarik u Jylliew, katba ki kynhun kiba shong ha ki kyrdan ba shatrai na ki ar group kin ioh ban ia aireng ha ka Playoff.
Kan long ruh ka sien kaba nyngkong ha ka lympung ba ia ka Decision Review System (DRS) yn pyntreikam ha baroh ki jingialehkai naduh ka rynsan iakhun Super Six.
