Greece, Jymmang:
Katkum ka khubor ba la ioh lum ka iathuh ba u Mark Philippoussis un ym lah shuh ban long u nonghikai jong uwei na ki khlur ialehkai Tennis na ka ri Greece u Stefanos Tsitsipas naba utei u nonghikai u la poi sha ka bynta kaba kut ha katei ka kam shakri.
Ka khubor ka iathuh ruh ba u Philippoussis u lah pyntyllun ia ka kam shakri ka jong u naduh ka por jong u kpa jong utei u rangialehkai u Apostolos ha ka bynta ba-ar jong ka aiom ialehkai ba lah dep bad uba lah iarap ia u tei u rangialehkai na ka bynta ban jam shaduh ka jingiakhun phainal ha ka Australian Open. Shuh shuh ruh u Tsitsipas uba lah shah pynliem noh ha ka jingiakhun phainal ha katei ka lympung ialehkai ha u bnai K’lyngkot ha u rangiakhun pyrshah na Serbia u Novak Djokovic, u lah kylla long ruh u rangialehkai uba tbit ha ka kam ialehkai ka jong u ha ka jingioh ia ka jingshah hikai na u Mark. Hynrei ka khubor ka iathuh ba u Philippoussis uba long u nongiakhun phainal mynshuwa jong ka lympung ialehkai ka Wimbledon bad US Open, u pynbna mynta ba ka jingiadei ka jong u kaba baroh shi katta bad u Stefanos ka lah kut noh; kata khyndiat sngi ha shuwa ban sdang ka lympung iakhun Grand Slam mynta u snem ka French Open.
