Shillong, Jymmang 24:
Ka PFR Football Academy ka la lah ban pynliem noh ïa ka Meghalaya Santosh Trophy Team lyngba ka tie-breaker da 5-4 kol ha ka jingïakhun semi final jong ka Invitation Football Tournament la pynïaid da ka Little Star Football Academy ha ka Sngi Balang ha Mairang
Ka PFR lyngba kane ka jingjop ka la ïoh rung sha ka final na ka bynta ban ïaknieh ïa ka nam lahduh ha ka 9 tarik u Jylliew.
Ka jingïalehkai ha kane ka sngi ka long kaba ïakhaid bha hapdeng baroh arliang. Ha ka kylla step, ka Meghalaya Santosh Trophy Team ka la ïoh ban thep ar kol, katba ka PFR Football Academy ka la ïoh ban thep shi kol. Ha kaba sdang jong ka kylla miet ka PFR Football Academy ka la shah thep biang sa shi kol ha ka Meghalaya Santosh Trophy Team bad dei ha shwa ban kut noh jong ka kylla miet ka PFR Football Academy ka la ïoh ban pynphai kylla haduh lai kol bad ka jingïalehkai ka la kut noh hapdeng ka jingïakhaid da 3-3 kol.
Dei lyngba ka tie-breaker ba ka PFR Football Academy ka la lah ban pynliem noh ïa ka Meghalaya Santosh Trophy Team.
Kawei pat ka jingïalehkai semi final kaba ar jong kane ka lympung kan long ha ka 1 tarik u Jylliew ha Mairang.
