Aizawl, Jymmang:
Ki bor pulit jong ka jylla Mizoram ha ka Sngi Ba-ar mynta ka taiew ki la pyntip ba ki la ïoh ban kem ïa uwei u samla (32 snem ka rta) ha ryngkat u drok ‘methamphetamine’ ba shongdor haduh T.19.5 klur. Ïa utei u samla la ïoh ban kem na ka nongbah Aizawl.
Kat kum ka jingpyllait kyrwoh jong ka tnat pulit, la pyntip ba hadien ka jingïoh ïa ki jingtip kiba bniah na ka liang ka kynhun Special Narcotics Cell jong ka tnat pulit Mizoram ha ryngkat ka jingwanïashim bynta jong ki bor shipai ka 2nd Assam Rifles ki la leit ban pynlong ïa ki jingkhynra ha kawei ka jaka ap bud kaba don ha ka kyntoit Ch.Chhunga, Thuampui bad dei na katei ka jaka ba ki la ïoh ban kem ïa utei u samla.
Kat kum ka jingïathuh jong ki bor pulit, ki la pyntip ba na utei u samla ïa u ba la tip kyrteng kum u Zothanmawia – nongshong shnong ka thaiñ Zokhawtar, Champhai District ki la ïoh ban kurup ïa haduh 9.750 kilo (100000 tylli) u droks methamphetamine. Ïa utei u samla, ki bor pulit ki la kem bad pynrung hapoh ki kyndon jong ka Narcotics Drugs & Psychotropic Substances Act, 1985.
