Shillong, Jymmang 24:
Ka jingïakren ban pynbeit ïa u pud u sam jong ka wat ba-ar hapdeng ki ar tylli ki Jylla, ka Meghalaya bad Assam ka la sdang ha ka sngi balang ha Khanapara. Ha kane ka sngi kitei ar ngut ki Myntri Rangbah ki la rai ban leit sha ki jaka ïakajia pud ha Karbi Anglong bad West Jaiñtia Hills ha u Jylliew.
Ha kajuh ka por, la rai ban bthah ïa ki Regional Committee ban pyndep ïa la ki kam bad nang pynkhreh ïa ki kaiphod khnang ba ha u Naitung kan don biang ka jingïakynduh jong ki Myntri Rangbah.
Ïa kane ka jingïakynduh kaba nyngkong jong ka jingpynbeit pud ha ka wat ba-ar la pynlong ha State Guest House ka Assam ha Koinadhara, Khanapara.
Ka jingïakren ka la sdang da ka jingïakynduh jong ki ar ngut ki Myntri Rangbah kita, u Myntri Rangbah ka Meghalaya u Conrad K Sangma bad u Myntri Rangbah ka Assam, u Himanta Biswa Sarma ha ryngkat ka jingdonlang kiwei pat ki Myntri Sorkar kiba kynthup ïa u Symbud Myntri Rangbah u Bah Prestone Tynsong bad u Bah Sniawbhalang Dhar, u Bah Comingone Ymbon nalor u Myntri ka Sorkar Assam, u Atul Bora bad u Pijush Hazarika, bad u Chief Secretary ka Jylla u Bah Donald P Wahlang.
Haba kren sha ki lad pathai khubor hadien ka jingïalang, u Myntri Rangbah ka Assam, u Himanta Biswa Sarma u la ong ba kine ki jaka 6 tylli ki dei kiba kham eh, bad ym lah ban buh por lypa na ka bynta ban lah pynbeit ïa ki jingïakajia.
Hynrei u la ong ba ha u bnai ba hynñiew lane Naitung, kan sa don biang ka jingïakynduh hapdeng ki Myntri Rangbah hadien ba la nang lah ban pyndep ïa ki kam da ki Regional Committee bad ki lah ban don ki jaka kiba ki ar tylli ki Jylla kin poi sha ka jinglah ban pynbeit.
U la ong ba ka jingleit jngoh ïa ki jaka ha Karbi Anglong bad West Jaiñtia Hills district ka long kum ka jingai mynsiem bad pynshngaiñ ïa ki briew namar ka don ka jingbym ïaid beit ka suk ka saiñ bad u kyrmen skhem ba yn sa lap ïa ka lad ban weng ïa ki jingeh bad pynbeit ïa u pud u sam.
Haba kylli kumno ka Sorkar Assam kan shim ïa ki sienjam ban lah pynbeit ïa u pud ha ki jaka jong ka Karbi Anglong Autonomous Council namarba ka ju pyneh bad ka don la kajong ka bor haba ïadei bad ki jaka ki puta jong ka, u Himanta u la ong ba ka Sorkar Assam bad ka Karbi Anglong Autonomous Council (KAAC) ki dei ki juh ha kawei ka Jylla. Hynrei u la ïathuh ba ki nongmihkhmat ka Karbi Anglong Autonomous Council ruh ki donlang ha ka Regional Committee jong ka Assam bad ki don ki rukom treikam ha kaba baroh ar tylli ki bor, ki shimlang ïa ka jingshaniah iwei ïa iwei pat, bad kaei kaba ka Sorkar Assam ka shim rai ka Karbi Anglong Autonomous Council ruh ka hap ban pdiang da ka jingsngewthuh lang, bad kaei kaba ka Karbi Anglong Autonomous Council ka shim rai ka hap hi ban ïathuh sha ka Sorkar Assam.
Haba u nongthoh khubor u buh jingkylli halor ka Notification jong u snem 1951 ha kaba ïadei bad ki jaka kum ha ka thaiñ Block-II ha kaba ki jaka ki shah pynngat sha Assam bad ka jingdonkam ban khyllie ïa kane ka Notification, u Himanta u la ong ba ïa ki jnit ki jnat kiba donkam yn sa peit bniah da ki Regional Committee jong baroh ar tylli ki Jylla.
Na ka liang u Myntri Rangbah ka Jylla, u Conrad K Sangma u la ïathuh ba ki don lai tylli ki Regional Committee kiba la thaw da baroh ar tylli ki Jylla. Ïa kine ki Regional Committee yn khlieh da ki Myntri Sorkar, ha kaba kin donlang ruh ki nongmihkhmat. U la ong ba ki kam jong ki Regional Committee ka long ban pyndep ïa ki kam ha kaba kin pynlong bun tylli ki jingïakynduh bad jingïasyllok kumba la leh ki Regional Committee kiba mynshwa.
Kumta u ngeit skhem ba hapoh ka jingïalam jong u Myntri Rangbah ka Assam bad ka Sorkar Pdeng, ki ar tylli ki Jylla kin sa lah ban poi sha ka thong ban pynbeit ïa u pud u sam ha ki 6 tylli ki jaka kiba dang sahteng. Ki 6 tylli ki jaka ba dang dei ban pynbeit pud ki long ka Langpih, Nongwah-Mawtamur, Deshdoomreah, Block-I Block-II bad Khanduli-Psiar.
Shuh shuh u la ïathuh ruh ba ka Survey of India kan nang bteng ban pyndep ban sorjamin ïa ki jaka ha ki 6 tylli ki jaka kiba la dep pynbeit bad la dep soi ïa ka MoU.
