Shillong, Jymmang 24:
Ka Shillong Lajong kaba dei ka lahduh jong ka Meghalaya State League ka la sdang da ka jingjop da haduh 10-0 kol pyrshah ïa ka Lumdiengngan ha ka Sngi Balang.
Ha kiwei pat ki jingïakhun, ka Langsning ka la lah ban pynliem noh ïa ka Umrit da 9-1 kol ha ka Group-A kaba la long ha madan MFA Turf kaba ha ka nongbah Shillong. Katba ha Jowai zone, ka Ladthadlaboh ka la jam sha ka kyrdan ba hakhlieh jong ka Group-B hadien ba jop da 2-0 kol pyrshah ïa ka Mulait United. Ha ka jingïakhun jong ka Group-D kaba la long ha Tura hapdeng ka Khliehmawlieh Youth Club bad ka Selsella Sports Association ki la ïasam mar 1 dor-thong (point) hadien ba ïakhaid mar 2-2 kol.
Ha katei ka jingïalehkai jong ka Group-C kaba la long ha madan MDSA kaba ha Mawkyrwat, u rangïalehkai ka Shillong Lajong u Babysunday Marngar u la ïoh ban thep marwei haduh san kol (25′, 31′, 42′, 46′, 49′), katba ïa kiwei pat ki kol la thep da u Wadajied Kynsai Ryngkhlem (4′), Pynche Tyngkan (16′), Atlanson Kharmaw (70′), Ioanis Suchen (77′) bad u Hardy Cliff Nongbri (90’+2).
Wat la ka MSL ka la ïaid mynta la artaïew, hynrei kane ka long ka jingïakhun kaba nyngkong eh jong ka Shillong Lajong namar ka dang don hapdeng ka jingïakhun jong ka wat kaba khatduh jong ka Second Division League ba la pynïaid da ka India Football Federation.
Ha ka jingïakhun jong ka Group-A, ka Langsning ka la ïoh ban thep haduh hynriew kol ha ka kylla step. Kine ki kol ki wan lyngba u Dauruhipaia Pale (3′, 45′), Arnesius Marwein (5′), Kordor Dkhar (12′, 42′) bad u Kynsaibor Lhuid (24′). Katba ha ka jingïakhun jong ka kylla miet, u Federick Wahlang u la ïoh ban thep kol ha ka minit kaba 52. Na ka liang ka Umrit ka la lah ban pynphai kylla shi kol lyngba u Wanroyshang Sangma ha ka minit kaba 68.
Hadien 3 minit ka Langsning ka la ïoh ban thep kol biang lyngba u Kynsaibor uba la lah ban pynpra ïa ki rangïalehkai ‘dien ka liang pyrshah. U Dauruhipaia u la khur syndon ïa ka hat-trick hadien ba u la ïoh ban thep ïa ka kol kaba lai ha ka minit kaba 87 na ka bynta ban khur syndon ïa ka jingjop.
Ha ka jingïakhun kaba la long ha Kiang Nangbah Stadium kaba ha Jowai, baroh ar kynhun ki la pyrshang ban ïakhun tyngeh naduh kaba sdang. Hynrei ka la shimpor haduh 40 minit ba ka Ladthadlaboh kan ïoh ban pynkhih jar nyngkong lyngba ka penalty ba la shut da u Stephanson Pale. Tang mar ïasdang ïa ka jingïakhun jong ka kylla miet, ka Ladthadlaboh ka la pynbud biang ïa ka kol ba ar lyngba u Nickyboy Swer ha kaba u rangapkol ka Mulait um shym la lah ban pyllait na ka jingshah thep.
Ka Ladthadlaboh lyngba kane ka jingjop ka la ïoh ban lamkhmat na ka Group-B ha kaba ka la kamai 10 dor-thong. Katba ka Rangdajied United pat ka la shem jingeh ban knieh ïa kane ka kyrdan wat la ka lah ban pynliem ïa ka Rymbai Iawpynsing ha ka Sngi Palei.
Haba phai sha ka jingïakhun ha Tura, ka Selsella Sports Association ka la ïoh ban pynkhih jar nyngkong eh ha ka minit kaba 4 lyngba u Maldrin Marak, hynrei u Kyntiew Marthong (6′) u la lah ban pynphai kylla shi kol na ka bynta ka Khliehmawlieh. U Maldrin (45′) u la ïoh ban thep ïa ka kol ba ar na ka bynta ka Selsella ha shwa ban kut ka jingïalehkai jong ka kylla step. Hynrei hadien shiphew minit ba la bteng ïa ka jingïakhun jong ka kylla miet u D. Marngar u la lah ban pynïakhaid kylla na ka bynta ka Khliehmawlieh.
Lyngba kane ka jingïakhaid ka la long ka jingplie lad ïa ki kynhun ha ka Group-D naba ka Wasa FC bad ka Khliehmawlieh ki la ïoh mar 7 dor-thong na ki lai sien ïakhun bad kin hap ban ïaknieh ban ïoh rung sha ka semi final.
Ha ka Sngi Palei kan don tang kawei ka jingïalehkai namar ki kynhun kiba don ha ka Groups-A, C bad ka D ki la ïoh shongthait shwa. Kumta ka jingïalehkai kan long tang ha ka Group-B ha kaba ka Rangdajied United kan ïakhun pyrshah ïa ka Rymbai Iawpynsing ha Jowai ha ka por 2:30 noh phai sngi.
