Maryvale, Jymmang:
Ki bor pyniaid ka Maryvale ha ka Sngi Nyngkong ki la pyntip ba ki la phah kem noh ia uwei u khynnah skul hadien ba la shem ia ka suloi AR-15 ha ryngkat ki kuli ba la thep hapoh ka tiphin ja jong u ha katei ka sngi.
Ki pulit ka Phoenix ki la iathuh ba ki la ioh jingtip na ki bor pyniaid ka skul Bostrom High School kaba don hapoh Maryvale ha ka opr kumba 1 baje nohphai sngi, ha kaba ki la lap ia utei u khynnah ba u kit lang ia katei ka suloi bad ki kuli shapoh skul.
Ki pulit ki la iathuh ba ia kitei ki kuli pat la lap na ka tiphin songja jong u hadien ba ki la talasi ia ka plakot kaba u kit ha katei ka sngi. Kumta ki bor pyniaid ki la pynsangeh bad khangdam noh ia katei ka skul tang mar ia ioh khubor halor katei ka jingjia namar ka jingbym shngaiñ halor ka jingrah tiar siat jong utei u khynnah bad ka jingbym tip shai ia ka daw ba sha
lyndet.
Wat la katta, ki bor pyniaid kim shym la pynpaw kyrteng ia utei u khynnah 15 snem namar u dang hap ha ki rta khynnah rit, hynrei ki pulit ki la rah noh ia u naduh ka Sngi Saitjaiñ naka bynta ban pyndep ia ki jingtohkit bniah. La pynngat ruh ia u hapoh jong 2 tylli ki kyndon pynkheiñ aiñ haba iadei bad katei ka jingrah tiar siat jong u sha jaka pule.
Ha katei ka sngi la ong ba ki don ki khynnah kiba la leit ban pyntip sha ki bor pyniaid skul ba don kiba rah tiar siat hapoh skul bad kumta ki bor pyniaid skul ki la pyntip mar-mar sha ki pulit bad ki pulit ki la ioh ban tehlakam noh ia kino kino ki jingjia ba sniew kiba lah ban jia lada ym shym la ioh knieh noh ia kitei ki tiar na utei u khynnah ha katei ka por.
Kumta ruh ki bor pyniaid jong katei ka skul ha katei ka sngi, ki la ai khublei bad ïaroh ia kitei ki khynnah kiba la pyntip halor katei ka jingjia namar ki la ong ruh ba ka jingshngaiñ jong ki khynnah skul bad ki dkhot ka skul ka shong ha ki nongpynïaid skul bad ka long ruh kaba don bok haduh katta ba ki don kiba pyntip bad ba ki la ioh ban tehlakam noh ia kano kano ka jingma kaba lah ban jia.
