Zaire, Jymmang:
Ka khubor ba lah ioh lum ka iathuh ba uwei na ki nongtied ba pawbha jong ka kynhun ialehkai Kriket ka West Indies u Devon Thomas u lah shah khang mynta ban shimbynta ha kino kino ki jingialehkai khlem kano kano ka jingshah buhpor halor ka kam beain kaba u lah leh kata da kaba donktilang ha ka ‘Match-Fixing’.
Kumta ruh u Thomas; 33 snem ka rta, uba ju iai mihkhmat ia ka ri jong u na ka kynhun ialehkai baroh kawei ha baroh ki bynta jong ki jingialehkai, u lah shah pynngat mynta ha ki kyndon jingpynshitom halor ka jingpynkhein ia ki kyndon. Shuh shuh ruh na ka liang jong ka International Cricket Council (ICC) kum shi bynta jong ka Sri Lanka Cricket (SLC), Emirates Cricket Board (ECB) bad Caribbean Premier League (CPL), ki lah pynngat ha ki kyndon jingpynshitom pyrshah ia utei u rangialehkai da ki hynniew tylli ki kyndon hapoh ka Anti-Corruption Code ka jong ki bad kaba lah pynlong ia u ba un shah sospon khlem kano kano ka jingbuhpor bad kaba lah ktah mardor naduh ka sngi ba u lah shah pynngat ha ki kyndon.
Ka khubor ka iathuh ruh ba u Thomas u lah shah jied ruh ka kyrteng jong u ha ka kynhun ialehkai Kriket ka West Indies na ka bynta ka jingialehkai ODIs jong u bnai ban wan ha ka jingiakhun pyrshah bad ka UAE.
Kumta ruh na ka liang jong ka CWI (Cricket West Indies) kam shym la don kano kano ka jingiadei kaba pyrshah ha kaba iadei bad katei ka jingrai pynrem ia u, hynrei kaba lah iengskhem pat na ka bynta ban iakhun ha ka ban rat dienkhong ia ka kam bamsap ha ka jingialehkai Kriket bad kaba lah ai ruh ka jingkyrshan kaba pura ia ka ICC ACU ha ka jingialeh jong ka ban ieng ha ka nongrim kaba ka don pyrshah ia ki nonglehkam beain ha ka kam ialehkai.
Ka CWI ka iai iengskhem ruh ha ka jinglen-lade ka jong ka na ka bynta ban rat dienkhong ia katei ka kam ba beain bad ka jingai jinghikai kaba shai sha ki nongialehkai jong ka kynhun baroh kawei bad kumjuh ruh sha ki nongpyniaid ia ka Anti-Corruption ha ka kam ialehkai.
