Aizawl, Jymmang:
U nongïalam jong ka Mizo National Front (MNF), u Rasik Mohan Chakma ha ka 24 tarik mynta u bnai u la shah pynbam smai ban shimti ïa ka kam kum u Chief Executive Member (CEM) ba thymmai jong ka Chakma Autonomous District Council (CADC).
Kat kum ki jingïohlum khubor la ïathuh ba u Chakma, ha ka Lah Sngi U Blei mynta ka taiew u la shah thung ha u Lat jong ka jylla Mizoram – Dr Hari Babu Kambhampati ban shimti ïa ka kam kum u CEM ba thymmai jong ka CADC.
Na ka liang u Lat ka jylla u la pynkhamti ruh ha u Hiranand Tongchangya ban shimti ïa ka kam kum u ‘protem chairman’ u ban pynïaid ïa ka jingïalang kaba nyngkong jong ka CADC bad kumjuh ruh na ka bynta ka ilekshon ban jied ïa u chairman jong ka CADC.
Ïa ka jingïalang bam smai ha ka 24 tarik mynta u bnai la pynlong ha ka ‘headquarters’ jong ka CADC kaba don ha ka shnong Chawngte/Kamalanagar.
Kat kum ki jingïoh lum khubor la ïathuh ba u Rasik Mohan Chakma (59 snem ka rta) u la shah jied haduh 6 sien ban long u dkhot jong ka CADC na ka thaiñ Borapansury constituency naduh u snem 1993. U la shah jied ruh ban long u nongmihkhmat sha ka Ïing Dorbar Thaw Aiñ jong ka jylla ha u ssnem 2003 katba u dang bat ïa ka kam kum u CEM jong ka CADC. Dei ha u snem 2006 ba u la ieh noh ïa ka kam kum u nongmihkhmat jong ka Ïing Dorbar Thaw Aiñ na ka bynta ban ïai bteng ïa ka kam kum u CEM jong ka CADC.
Kum ban shu ïathuh hangne, ha ka ilekshon CADC kaba la pynlong ha ka 9 tarik mynta u bnai, ka seng MNF ka la ïoh rah ïa ka nam lahduh ha kaba ka la ïoh ïa ka jingjop na ki 10 tylli ki thaiñ. Ha katei ka ilekshon, ka BJP ka la jop na ki 5 tylli ki thaiñ bad ka seng Congress pat ka la ïoh jingjop na ki 4 tylli ki thaiñ.
Hynrei la ïathuh pat ba hadien katei ka ilekshon, ki la don 3 ngut ki dkhot jong ka BJP bad 2 ngut ki dkhot jong ka Congress kiba la leit ban pynïasoh noh ïalade bad ka seng MNF.
