Beijing, Jymmang:
U kapten jong ka kynhun iakynjatbol ka Argentina u Lionel Messi u lah ioh mynta ia ka kam na ka bynta ban long u nongialam banakhmat jong katei ka kynhun ha ka jingiakhun pyrshah ia ka Australia ha kawei na ki jingialehkai paralok ka ban sa long ha Beijing ha u bnai ban wan; ha ryngkat bad ka jingleit iuhkjat ka jong u ha ka sien kaba nyngkong sha ri China ha ki hynriew snem kynthih na ka bynta ban pynbun briew ha ka madan ban pynlong ia ka jingiakhun hapdeng kitei ki ar kynhun.
Na ka liang jong ka Argentina Embassy kaba ha China ka iathuh ba katei ka kynhun kaba lah rah ia ka trophy World Cup ha u 2022 kan iakhun pyrshah ia ka Australia ha ka 15 tarik u Jylliew da kaba wanlam ruh ia u Messi sha ka tei ka ri ha ka sien kaba nyngkongeh naduh u snem 2017.
Kan long ruh ka sien kaba hynniew ha kaba u Messi un leit ban jngoh biang ia ka ri China bad ha kajuh ka por ruh ka lah ban long ka lawei na ka bynta ka kam ialehkai ka jong u ba u lah ban leit pyniasoh bad kawei na ki klob ialehkai ka lympung Chinese Super League.
Hynrei kiwei pat ki tyllong khubor ki iathuh ba u Messi u lah ioh ia ka jingtyrwa kaba donburom na ka ri Saudi Arabia na ka bynta ban pyniasoh noh bad ka klob ialehkai na katei ka ri ka Al-Hilal naduh ka aiom ialehkai ka ban wan.
Kumta ruh naduh ba u Messi u lah leit sha China ha ka sien kaba nyngkongeh ha u snem 2005, utei u rangialehkai u lah ialehkai na bynta ka Argentina ne na ka klob ialehkai barim ka jong u ka Barcelona ha ka jingialehkai paralok.
