Shillong, Jymmang:
Ka Khasi Jaiñtia Presbyterian Synod Sepngi kaba long ka ‘sponsoring body’ jong ka K.J.P. Girls’ Higher Secondary School, Shillong ka la khot kyrkieh ïa ka Executive Committee ha ka 24 tarik u Jymmang 2023 halor ka jingjia ba sngewsih namar ka jingjia ryngkhatba ka ding ka la bam duh ïa ki jingtei kaba long ki matti barim jong ki ‘missionary’ ha ka step phyrngap jong ka 21 tarik u Jymmang 2023. Ka jingïalang Pyrkhat kam ka Executive Committee ka dap da ka jingsngewsih bad sngewkhia kaba khraw halor kane ka jingjia.
Katei ka jingjia shisha ka ktah jur ïa ki nongpule bad ka jingduh kaba khraw ïa ki tiar ki tar bad mar ba kordor jong ka skul. Kane ka skul ka long kawei na ki skul ba la rim tam ha ka jylla bad ka thain jong ka Ri. Ka la sei bad pynmih ïa shibun ki longkmie kiba la long ka jingkyrkhu bad jingmyntoi ia ka imlang sahlang ha ka thain bad ka Ri ha ki kyrdan bapher bapher.
Ha kum kane ka jingjia ka Synod ka pynpaw ka jingsngewnguh ïa i Principal, Vice Principal, ki nonghikai, ki nongtrei kiba la shim ïa ka jingkit khlieh ha kiba bun bynta ban peit bad pynbit pynbiang ïa ka jingdonkam ka skul kum ha kane ka por. Ka Synod ka kyntu ruh ïa ki kmie ki kpa bad ki khynah skul ba kin ym don kano kano ka jingsngew namar ka Synod lem bad ki bor pynïaid jong ka skul ki la shim khia ban pynïaid beit ïa ki klas kumba ki dei ban long khnang ba kan ym don ka jingduh ïa ki nongpule.
Ka Synod ka pynpaw ka jingsngewnguh eh ïa ka Dorbar Shnong Mission Compound baroh kawei kiba la shim khia lang naduh ki nongkitkam shnong bad ki nongshong shnong kiba la ïarap bad ai jaka rieh shipor ha ka Dorbar Shnong Hall ka shnong ïa ki khynnah ‘hostel’ bad ki la pynbiang ïa ka sha step. Ka pynpaw ruh ka jingsngewnguh ïa u Conrad Sangma, Myntri Rangbah ka jylla, Bah Adelbert Nongrum, MLA, Bah W.R. Kharlukhi MP Rajha Sabha, kiwei pat ki Myntri ka Cabinet jong ka Sorkar Meghalaya, ki M.L.A., ki M.D.C. ki Seng Balang, ki ‘riewshimet bad kiwei kiwei kiba la kloi ban ïasnoh kti bad ïadon bynta ha kane ka jingjia kaba sngewsih. Na ka liang ka Synod ka kyrpad ïa baroh ban kynmaw kyrpang ha ki jingduwai na ka bynta ka skul bad ki khynnah pule. Kane ka long kat kum ka kyrwoh ba la phah da u Rev. W.P. Marbaniang, Moderator ka K.J.P Synod Sepngi.
