Salalah Jymmang:
Ka jingsdang jong ka jngiaid lynti da ka kynhun ialehkai Hockey ki shynrang ka ri ha ka Men’s Junior Asia Cup Hockey tournament ka lah long kaba seisoh shibun bad ka jingjop kaba khraw jong ka kynhun ba ka lah khur na katei ka lympung ialehkai ha ka jingialehkai kaba nyngkong ka jong ka, hadien ba katei ka kynhun ka la lah ban pynbam haduh 18-0 kol ia ka kynhun iakhun pyrshah ha ka pool A ka Chinese Taipei.
Haba phai sha kitei ki khat-phra kol ba ka kynhun ka la lah ban khur na ka jingiakhun baroh kawei ka long lyngba u Araijeet Singh Hundal uba lah iohlad ban pynkhih jar haduh saw sien kynthih kata ha ka minit ialehkai ba 19′, 19′, 30′, 59. Katba u Amandeep pat u lah nang iai pynkhlain shuh shuh ia ka kynhun da ki lai kol ba u lah ioh ban thep; ha ka mini tba 37′, 38′, 41′.
Kumta ruh ka kynhun ka lah ioh ban kamai ia ki ar kol na u kapten jong ka u Uttam Singh ha ka 10′, 59’min, na u Boby Singh Dhami ha ka 11′, 46 min bad na u Chandura boby Poovanna ha ka ‘9’, 54′; katba u Aditya Arjun Lalage u lah ioh ban khur tang kawei ka kol ha ka 37min ialehkai, u Sharda Nand Tiwari ha ka 11min, Angad Bir Singh ha ka 37 min, Amir Ali ha ka 51min bad ka kol ba khatduh ha ka 60min ialehkai ba lah pynioh da u Rawat Yogember.
Naduh kaba sng jong ka jingialehkai, katei ka kynhun ialehkai ka ri ka lah pynkhlain ka rukom ialehkai jong ka da kaba kamai ruh shalade ia kawei ka PC (penalty corner) ba ka donkam eh ha ka jingiakhun. Hynrei ia ka jingtied jong u Sharda Nand Tiwari la lah ban tem noh da u nongapkol ka kynhun iakhun pyrshah. Kumta u kapten ka kynhun u Uttam Singh u la lah ban pynpra ia ka kynroh bakhlain jong ka kynhun pyrshah da kaba ioh thep kol ha ka 10min kaba long ka kol ba nyngkong na ka bynta ka kynhun ialehkai ka ri bad hadien katto katne sekhon ka kynhun ka lah ioh kamai kol shuh shuh sa ha ka 11 min na u Boby Singh Dhami bad ha katei kajuh ka minit, u Sharda Nand Tiwari u lah ioh ban thep kol kaba long ka kol balai ka kynhun na ka PC ha kaba lah pynlong ia ka kynhun ban pyndep ia ka quarter iakhun ba nyngkong da kaba tam kol shakhmat da 3-0.
Katba nangiaid ka jingialehkai ha ka jingiakhun ba shadien, ka kynhun India ka lah nang iai bteng ia ka jingpyniaid jong ka ia ka jingialehkai ha ka kylla ba-ar bad ioh ruh ban khur shalade sa kawei ka PC, hynrei ka jingtied na u Rohit la lah ban tem noh ha ka jylli jong ka kynhun iakhun pyrshah, hynrei katto katne por hadien u Araijeet Singh Hundal u lah ioh ban the par kol ha kajuh ka minit ialehkai kata ha ka 19.
Ha tmier jong ka jingkut noh ka por ialehkai ha shuwa ka jingiashongthait, u Araijeet u lah ioh ban tied da kaba tyngeh ia ka bol ha ka 30min kaba lah leit ban rung beit shapoh kol na ka bynta ban pynlong ia ka India ban tam jingjop da 6-0 kol.
Haduh kattei kol ba ka India ka la lah ban tam shakhmat, ka kynhun pyrshah ka lah sdang ban pyni ia ka jingdonkam jong ka ban khyllie ia ki kol shah thep ha kaba sdang jong ka quarter balai, hynrei kam shym la iohlad satia namar ka jingnang iai pynsted ka India ha ka ban kamai kol shuh shuh katba ka por ialehkai ka dangbun lyngba ki kol na u Boby Singh Dhami, Angad Bir Singh, Aditya Arjun Lalage,Amandeep bad pynlong ia ka kynhun ban iai tam kol shuh shuh shakhmat sa da 9-0 bad kaba lah iai bynrap shuh shuh sa lai kol ha shuwa ban kut noh katei ka quarter iakhun na ka bynta ban nang iai tam kol shakhmat da 12-0.
Naba sa 15 min dangsah ka por ialehkai, ka India ka lah nang iai bteng ha ka ban jam shuh shuh shakhmat ha kaba u Boby Singh Dhami sa shisien u lah ioh ban thep kol ha ka 46 min bud sa ka kol na u Amir Al na ka PC kaba lah kyntiew kol shuh shuh ia ka kynhun sha ka 14-0.
Hynrei kaba lah nang iai bteng ha ka ban khur kol na ka jingiakhun lyngba u Chandura boby Poovanna ha ka 54min uba lah kyntiew sha ka 15 kol ia ka kynhun katba u kapten ka kynhun u Uttam Singh sa shisien u lah ioh ban thep kol ha ka 59 min bud sa ka kol na u Araijeet ha kajuh ka minit ialehkai bad u Rawat Yogember uba lah pynkut syndon ia ka jingthep kol ka kynhun ha ka 60min.
Hadien katei ka jingjop kput ka kynhun pyrshah ia ka Chinese Taipei, ka kynhun ialehkai u Uttam Singh kan pynkhreh bha shuh shuh sa na ka bynta ka jingiakhun bad ka Pakistan ha ka 27 tarik mynta u bnai; ha shuwa ba kan iakhun pyrshah ia ka Thailand ha ka jingialehkai ba khatduh na ka Pool kata ha ka 28 tarik mynta u bnai.
