Shillong, Jymmang 25:
U Bah KP Pangniang uba dei u President ka Hill State People’s Democratic Party (HSPDP) ha ka Sngi Palei u la ong ba ka jingïatreilang jong ki seng riewlum kam pat dei ka por ban ïakren namar ka eh than ban ïakren ïa mynta hi hynrei baroh ki seng riewlum ki donkam ban don ka jingïasngewthuh jingmut lang.
U Bah Pangniang haba kren sha ki lad pathai khubor, u la ong ba kum ka seng kaba ïasynroplang bad ka sorkar Meghalaya Democratic Alliance (MDA), ka don la ki jong ki mat treikam bad la ki jong ki nongrim bad ka seng ka ïeng skhem beit ha ka nongrim ba kam dei ban don kano kano ka jingktah ïa ki samla wad kam wad jam da kaba pyntreikam ïa ka Roster System.
“Ngi ïeng skhem ba kan ym dei ban don kano kano ka jingktah ïa ki samla wad kam wad jam hapoh kane ka Rilum Khasi bad Jaiñtia, kata ka dei kaba ngi ïeng,” la ong u Bah Pangniang.
Nangta, u la ong na ka liang ka sorkar MDA ka la thaw da ka komiti ha kaba ha kane ka komiti, ka seng HSPDP ka kwah ban ïakren kham bha ba kan nym don kano kano ka jingktah ïa ki samla wad kam na ka daw ka jingpyntreikam ïa ka Roster System.
Nalor kane, u Bah Pangniang u la ong ba lada pyntreikam ïa ka Roster System da ka bhah kaba 40/40 kan long beit nangne shakhmat bad ym ban phaidien. U la ong ba katkum ka mat treikam kaba ka seng ka don ka long ban nang pynbha shuh shuh ïa ka Reservation Policy.
“Ngi kum ka seng, ngi don hok ban kren ha ka jingïalang lane ka komiti ban pynlong da ka MDA ban pynbha shuh shuh ïa ka Reservation Policy,” la ong u Bah Pangniang.
Haba kylli halor ka jingbym don ka jingïatylli jong ki seng riewlum, u Bah Pangniang u la ong ba kaba donkam ka long ban don ka jingïasngewthuh jingmut bad ka jingïamir jingmut lang bad u la ong ba kaba ki ju ïakren ka long ban nang pynbha shuh shuh ïa ka kynhun jong ki seng riewlum kaba la tip kum ka Regional Democratic Alliance (RDA) kaba la don lypa.
“Nga kyrpad bad nga sngewdei bad ngan ïai ong ïalade bad ïa ki seng riewlum ba ka dei ban don ka jingïasngewthuh jingmut lang la ngim pat don ka jingtreilang haba ngi ïakren ïa kino kino ki mat jong ka Jaitbynriew,” la ong u Bah Pangniang.
