Delhi, Jymmang:
Na ka liang jong u Secy ka BCCI u Jay Shah u iathuh ba ia ka rai ba khatduh na ka bynta ban pynlong ia ka lympung ialehkai Kriket ka Asia Cup ha kiwei pat ki ri yn sa rai hadien ba lah dep ban pynlong ia ka lympung ialehkai Indian Premier League. Ha kata ka jing-ialang kaba khatduh yn sa wan ban shimbynta da ki kynrem-ki-lyndan jong ka Asian Cricket Council (ACC).
Nangta u lah pynpaw ruh ba ia mynta ia ka rai halor katei ka kam na ka bynta ka ri ban pynlong ia ka lympung ialehkai ym pat shim ia kano kano ka rai ba khatduh namar ka ri baroh kawei ha ryngkat bad ki kynhun ialehkai Kriket ka ri ki dang bunkam ha ka IPL. Katba ki heh ki hain jong ka Sri Lanka Cricket (SLC), Bangladesh bad Afghanistan Cricket Board kin wan ban sakhi ia ka jingiakhun phainal jong ka IPL bad hadien kata yn sa shim ia ka rai ha kaba iadei bad ka jingpynlong ia ka Asia Cup ha ka por kaba kloi-lan. Kumba ka paw haduh mynta ka long ba ka ri kaba lah ioh ha ka ban pynlong ia katei ka lympung ialehkai ka dei ka Pakistan, hynrei ka kynhun ialehkai Kriket ka India ka pynpaw ban ym leit shimbynta ha ka lympung sha katei ka ri khlem da ioh jingbit satia na ka sorkar-pdeng ka ri, watla na ka liang jong u nongpyniaid bahakhliehduh jong ka PCB u Najam Sethi u lah ai jingmut na ka bynta ban pyntreikam da ka ‘Hybrid Model’; ha kaba saw tylli ki jingialehkai jong ka lympung lah dep ban pynlong ha kawei na ki madan ialehkai jong ka ri Pakistan. Shuh shuh lah sngewwthuh shai ruh ha kaba iadei bad ka tyllong khubor na ka ACC ba ka jingai jingmut u Sethi ha kaba iadei bad ka jingpyntreikam da ka ‘Hybrid model’ ha kaba ka Sri Lanka, Bangladesh, Nepal bad Afghanistan kin ialehkai saw tylli ki jingialehkai ha kaba nyngkong ha Pakistan ha ryngkat bad ka kynhun ialehkai na India kan ialehkai baroh ki jingialehkai ha ki madan ba-pdeng (Neutral venues) bad ka paw ruh kum ka jingai jingmut kaba biang tam eh watla na ka liang jong ka ACC kam pat shym la shim ia kano kano ka rai halor katei ka bynta.
Shuh shuh ruh, ar tylli ki jingialehkai ha ka jingiakhun pyrshah hapdeng ka India & Pakistan kin long ruh ha Sri Lanka, watla na ka liang jong ka PCB ka kwah ban pynlong ia kitei ki jingialehkai ha Dubai.
Na ka liang jong ka PCB kam shym la don kano kano ka jingeh ba ka India kan ialehkai ha ka madan-pdeng. Watla na ka liang jong ki nongpyniaid ki pynpaw ia ka jingkwah jong ki ba ki jingiakhun hapdeng ki ar ri kin long beit ha Dubai namar ka lah ban lam ruh sha ka jingbun ki briew ki ban wan tuid na ka bynta ban sakhi ia ki jingiakhun hapdeng kitei ki ar ri bad ka jingiohnong ruh kumjuh ha ka ioh-ka-kot, watla lah plie ruh ka lad na ka bynta ban ialehkai ha kiwei pat ki ri kata ha Sri Lanka; nalor ki jingialehkai jong ka ACC ha kaba ka jingiohnong ka lah kot sha ka USD 0.5 million ha kaba ka Sri Lanka Cricket (SLC) ka lah ioh ban khur shalade ha u snem 2022 na ki jingialehkai hapdeng ka India-Pakistan ha Dubai.
Ka khubor ka iathuh ruh ba ka jynkhang na ka bynta ka Asia Cup mynta u snem kan long hapdeng ka 1-17 tarik u bnai Nailur.
