Guwahati, Jymmang:
Da kaba pynïaibteng ïa ki jingleit khynra ha ki jaka sangeh rel bapher bapher kiba hap hapoh ka jingkhmih jong ka North Frontier Railway (NFR), ki bor pahara ka Railway Protection Force (RPF) hapdeng ka 16 tad haduh ka 22 tarik mynta u bnai ki la ïoh ban pyllait im ïa 42 ngut ki briew, kynthup ïa 36 ngut ki khynnah rit, 2 ngut ki brie ba don jingduna dkhot met, 2 ngut ki longkmie bad 2 ngut ki khynnah kynthei.
Ha katei ka jingleit khynra jong ka RPF, ki la ïoh ruh ban kem ïa 2 ngut ki runar kiba la donkti ha ki kam ban khaïi beaiñ ïa ki briew.
Ïa ki briew kiba ka RPF ka la ïoh ban pyllait ha kitei ki tarik la leit ban aiti biang sha ki bahaïing hasem jong ki hadien ba la dep ïa ki kyndon aiñ kiba donkam. Ïa ki jingleit khynra na ka liang ki bor pahara ka RPF ki la leit ban pynlong ha ki jaka sangeh rel kiba don ha ka thaiñ Katihar, Purnea, Barsoi, Kumedpur, New Bongaigaon, Rangiya, Kamakhya, Guwahati, Mariani, Tinsukia, New Jalpaiguri, New Tinsukia bad Dimapur.
Kat kum ka kyrwoh ba la pyllait da ka RPF, la ïathuh ba ha ka jingleit khynra kaba la pynlong ha ka 17 bad 18 tarik, ki bor pahara ka RPF ki la ïoh ban pyllait im ïa 9 ngut ki khynnah rit bad ïa kawei ka longkmie. Ha katei ka jingleit khynra, ki bor pahara ka RPF ki la ïoh ruh ban kem ïa uwei u runar u ba ju donkti ha ki kam ban die beaiñ ïa ki tiket shong rel. Ïa ki jingleit khynra ha kitei ki tarik la pynlong ha Katihar, Guwahati, Dimapur, Kamakhya, Kishanganj, bad New Tinsukia.
Ha ka jingleit khynra jong ki bor pahara ka RPF ki la ïoh bat ruh ïa 9 ngut ki khynnah rit bad kawei ka longkmie kiba phet jyndat na la ki jong ki ïing ki sem.
Kat kum ki jingïoh lum khubor la ïathuh ba na ka liang ka RPF bad ka Association of Voluntary Action kaba la ju tip mynshwa kum ka ‘Bachpan Bachao Andolan’ ki la dep ruh ban ïasoi ïa kawei ka soskular sngewthuh jingmut na ka bynta ki kam ban ïatreilang ha ki kam khynra ha ki jaka sangeh rel bad leit pyllait im ïa ki briew kiba shah rahbor ha ryngkat ka jingthmu ban pynïaid iew beaiñ ïa ki.
Ka Association of Voluntary Action ka dei ka seng treikam ba la seng da u Kailash Satyarthi. Kum ban shu ïathuh hangne, naduh ka 17 tarik u Risaw, 2020 la pynsdang ïa ka prokram kaba la tip kyrteng kum ka “Meri Saheli” na ka bynta ban pynbiang ïa ki lad jingïada na ka bynta ki ‘riew kynthei kiba leit jingleit jngai da ki rel, khamtam na ka bynta ki ‘riew kynthei kiba ju leit jingleit marwei.
