Nongstoiñ, Jymmang 25:
Ki ar ngut shi kmie shi khun na ka shnong Wahthre, Shallang ha West Khasi Hills ki la jah bad haduh mynta kim pat shym la wan phai ïing satia.
Ka tyllong khubor na u Superintendent of Police ka West Khasi Hills District ka ïathuh ba halor katei ka jingjia bad ka jingjah jong kitei ki shi kmie shikun, u Kresh G Marak, uba dei u kurim uba na ka shnong Wahthre, Shallang, u la wan ban ai ïa ka jingujor ba ka lok jong u, ka Pronitha Ch Sangma, 35 snem bad ka khun ka Achana Ch Sangma, 10 snem, ki la jah naduh ka 15 tarik u Jymmang, 2023 bad haduh mynta ym pat ïoh jingtip wat u Kresh G Marak uba long u lok jong ka, bad u kpa itei i khun bad wat ki bahaïing hasem ruh kumjuh kim tip shano ki don.
Shuh shuh ka khubor na u SP ka ïathuh ruh ba ka Pronitha Ch Sangma, ka don ïa ka rynïeng ba 4 phut 6 inshi eiei, kaba shai ka snieh doh bad ha ka por ba ka jah ka phong ïa ka blouse rong saw blad (pink) bad muffler rong soh ñiamtra. Katba ka khun (Achana Ch Sangma) ka don ïa ka rynïeng ba 3 phut eiei, shai snieh doh, kham raikhoh bad ka phong ïa ka blouse rong saw blad ha ka por ba ka jah.
Kumta la kyntu ïa kino kino kiba ïohi ne don jingtip shaphang jong ki, kin sngewbha ban pyntip sha ki pulit bad kumjuh sha ki thanat kiba don marjan bad ki.
