Shillong, Jymmang 25:
Ka Mylliem Block Congress Committee (MBCC) ha ka Sngi Palei ka la pynrem jur ïa ka jingwan shong ryngkat bad ka rah jingthoh (banner bad placard) hakhmat ka ïing sah jong u Bah Ronnie V. Lyngdoh, MLA jong ka Mylliem konstitwensi, ha ka 23 tarik Jymmang, 2023 da ki briew kiba kam ba ki dei ki dkhot jong ka Voice of the People Party (VPP).
Ha u kyrwoh khubor, u President ka MBCC, u Bah Richard Marweiñ, u la ong, “Ha ka jingïakren ka jong ngi bad kine ki briew ha kane ka sngi, ki la pynpaw ba ki ïa wan ban pan ïa ka jingkyrshan na i MLA ka Mylliem na ka bynta ka jingïakhih jong ka VPP.”
Hynrei u la ong, lada kano kano ka kynhun kaba wan pan ka jingkyrshan ïa kano kano ka kam, ym da donkam ban ïa rah ‘banner’ lane ‘placard’. Ka shlem treikam jong u MLA ka Mylliem ka don bad kaba ki paidbah ki lah ban ïa rung ïa mih ban ïamir jingmut halor kano kano ka phang, la ong u Bah Marweiñ.
U la pynkynmaw ruh ba ki nongïalam jong ka VPP naduh kaba sdang kim kwah ban ïa kyrshan bad ïatreilang bad kiwei pat ki kynhun hapoh ka liang pyrshah bad kane ka jingwan ïashong hakhmat ka ïing sah jong u MLA ka Mylliem ka lah ban dei kawei na ki lad jingpynkhreh ilekshon MDC jong ka VPP.
“Na ka liang ka jong ngi bad jong i Bah Ronnie V. Lyngdoh, ngi wad ïa ki lad ki lynti kumno ban weng ïa ki jingeh jong ki paidbah bad ka jaitbynriew ha kaba bun ki liang na ka por sha ka por. Ngi kyntu ïa ki paidbah ruh baroh ba ngin ïatreilang ha ki mat baroh ki ban long ka jingkyrkhu ïa ka jaitbynriew pateng la pateng. Ngi sngewdei ban pynpaw ruh ba man u briew bad man ki kynhun ki don la ka jong ka rukom treikam watla ka thong ka long kajuh. Ngi la jied ïa ki nongmihkhmat ba kin sngap bad kin sngew ïa ka jingkhia ka jingjynjar ka jong uba bun uba lang bad ba kine ki nongmihkhmat kin ïasaid bad thaw ïa ki aiñ ha ki rynsan kiba dei ïa kaba ki la shah jied,” la ong u Bah Marweiñ.
