Shillong, Jymmang 25:
U nongïalam ka United Democratic Party (UDP), Bah Titosstarwell Chyne, u la ong ba ka seng ka la dep ban phah ïa ki briew ban mihkhmat sha ka Committee ban ïakren halor ka Roster System bad na ka liang ka seng kan sa ïakren ruh bad ka Sorkar haba ïadei bad ka Reservation Policy.
Haba ki nongthoh khubor ki buh jingkylli ha ka Sngi Palei halor ka nongrim ba ka UDP ka ïeng, u Bah Titos, uba dei ruh u Chief Executive Member ka Khasi Hills Autonomous District Council, u la ong ba katkum ka jingthoh kaba la ai da u General Secretary ka UDP ha kaba ïadei bad ka jingpyntreikam ïa ka Roster System, la ong ba dei ban pyntreikam beit katkum ka por ba mynta nangne shakhmat.
Nangta, u Bah Titos u la ong ruh ba ïa kane ka mat ym dei tang ki seng riewlum kiba sngewkhia, hynrei wat ki National Party ruh ki sngewkhia. Kumta na ka liang ka UDP ka dang pynkhreh ïa ka jingthoh ban ai sha u Myntri Rangbah namar ba la 50 snem ka la ïaid, hynrei khlem pat pynbeit ïa ka Reservation Policy.
U la ong ba kaba donkam eh ka long ban nym kdew kti ïano-ïano, hynrei ban ïatylli bad long kawei.
Haba kylli halor ka jingong ka VPP ba ka Reservation Policy ka dei kaba leh da ki nongïalam kiba mynshwa kiba khlem pyrkhat, u Bah Titos u la ong ba ha u hi shimet, ban shu kynnoh ïa ki nongïalam kiba mynshwa um sngew dei satia, hynrei ban ong ba ka Reservation Policy ka biang ruh ym lah ban ong, namar ba baroh shi katta la pyntreikam ïa ka.
Namar kata, u la ong ba katkum ki kyndon ka Riti Synshar ka ri, ïa ka Reservation Policy dei hi ban khmih biang man la ka 10 snem.
