Shillong, Jymmang 25:
U Myntri ka tnat Pule Puthi ka jylla u Rakkam A Sangma u la maham lypa ba ka Voice of the People Party (VPP) ka la ïalehkai bad ka ding ka ban sa pyning ïa ngi baroh.
U Rakkam ha ka Sngi Palei haba kyntu jur ïa u President ka VPP u Bah Ardent M Basaïawmoit, u la ong ba un kiar na ka jingpynbteng ïa ka jingshong shah thngan ba khlem pud namar kane ka lah ban wanrah ïa ka jingktah kaba jur bha.
“Ngi ïalehkai bad ka ding mynta bad kan sa pynpdung ding ïa baroh, kynthup ïa ka VPP. Kan sa pynjot ïa ka lawei jong ki khun samla jong ngi,” la ong u Rakkam halor ka jingïakhih u Bah Ardent.
Ha kawei pat ka liang, haba ther ïa ka Voice of the People Party (VPP), u Rakkam u la ong, kum kane ka jingleh politik bad ka drama kan sa buh ïa ka jylla ha ka jingeh kaba khraw. “Ngi ïalehkai bad ka ding bad kan sa pyning ïa baroh,” la ong u Myntri.
Lah ban pynkynmaw ba ka jingshong shah thngan khlem pud jong u Bah Ardent ka la jam sha ka sngi kaba lai kaba la sdang naduh ka 23 tarik mynta u bnai ba la pynlong ha jaka pynïeng kali kaba don marjan bad ka Additional Secretariat ban pynbor ïa ka Sorkar ba kan khot ïakren ban shong bishar biang ïa ka Reservation Policy ka Jylla.
Shuh shuh na ka liang une u Myntri ka tnat Pule Puthi u la sot nuksa na ka mukotduma ha Maharashtra ha u snem 2014 ha kaba ka ïingkashari Supreme Court ka la pynïap ïa ka ‘Ordinance’ ba la pyntreikam da ka Sorkar Jylla, kaba mang tam ïa ka bhah ba 50% sha kawei ka jaidbynriew riewlum. Ka ïingkashari ka la pynmih ïa ka ‘circular’ sha baroh ki Jylla kynthup ka Meghalaya, ba dei ban sam bhah ym palat ïa ka 50%.
U Rakkam u la ban jur “Ngi don ha ka jingma namar ka Meghalaya mynta ka ïoh haduh 85% ka bhah ïa ki paid riewlum, ha kaba 80% la sam sha ki Khasi-Jaintia bad Garo, katba 5% la ai sha kiwei ki paid riewlum. Haba ka ïingkashari Supreme Court kala pan jubab na ka Jylla, ka Sorkar Meghalaya ka la ai ïa ki daw ba pynksan halor ka bhah ba 85% myn ha ka 27 tarik Lber, 2021. Hynrei ka rai jong ka Supreme Court halor kane ka kam ka dang sahteng haduh mynta”.
Haba kdew ïa ka mukotduma u snem 1992 ha ïingkashari Supreme Court ba long mamla ka Sorkar Kerala, u Myntri u la kdew ba ka ïingkashari ka la ai rai ba kano kano ka ‘Job Reservation Policy’ bad ‘Appointment Policy’ kam dei ban tam ïa ka 50% ka bhah.
U la maham, “Ka jingpynbteng ïa kane ka drama ka lah ban lam sha ki jingjia ki bym lah ban tip, bad lada ïa ka reservation policy jong ngi la pynïap noh, dei ma ngi kiba hap shim ïa ka jingkitkhlieh. Kane ka dei kaba la jia teng ha ki snem ba la leit noh. Lada kum kine ki jingjia ki wan jia, ki pateng jong ngi kin nym map satia ïa ngi”.
