Shillong, Jymmang 25:
Hadien ba ka wanphai biang sha ka lympung I-League, ka Shillong Lajong FC ka khmih lynti ban rah biang ïa ka nam lahduh ha ka Meghalaya State League mynta u snem.
Kane ka kynhun ïalehkai jong ka Shillong Premier League ka la lah ban pynpaw ïa ka jingtbit ha kaba sdang jong kane ka lympung da ka jinglah ban pynliem ïa ka Lumdiengngan haduh 10-0 kol ha ka jingïalehkai jong ka Group-C (Mawkyrwat zone).
Wat la kane ka lympung ka la ïaid mynta la kumba artaïew, hynrei ka Shillong Lajong ka la sdang ïa ka jingïalehkai kaba nyngkong namar ka don hapdeng ka jingïakhun jong ka wat kaba khatduh ha ka Second Division League ba la pynïaid da ka India Football Federation. Kane ka kynhun ha ka Sngi U Blei ka la lah ban pyntikna ka bynta ban long ka kynhun kaba nyngkong eh ban ïoh rung sha ka I-League hadien ba ka la shah pynhiar kyrdan ha ka aïom ïalehkai 2018-19.
Haba ïakren bad u Coach kane ka kynhun u Bah Bobby Lyngdoh Nongbet u la pynpaw ïa ka jingkmen ba kum ka kynhun ka la lah ban ïalehkai bha ha ka jingïakhun kaba nyngkong pyrshah ïa ka Lumdiengngan. “Nga sngewkmen eh ba wat hapdeng ka jingïai bteng ki lympung ïalehkai, hynrei ki rangïalehkai ki la lah ban ïalehkai bha ha kane ka jingïakhun kaba nyngkong.”
Nalor ka Lumdiengngan, katei ka lahduh jong ka MSL 2019 kaba la shah kynthup lang ha ka Group-C bad kiwei ki kynhun kiba na West Khasi Hills bad South West Khasi Hills kiba kynthup ïa ka Pyndengrei SCSC, Mawten SC, Riangdo YSCA bad ka Seven United SCCC.
“Ngi dang ïalehkai tang shisien ha kane ka lympung, hynrei kane ka jingïakhun kan dang long kaba jwat bha ïa ngi namar ngin hap ban ïakynduh ïa kiwei pat ki kynhun kiba don lang ha kane ka group,” la pynpaw u Coach.
Haba kylli la ka Lajong ka don ne em ïa ka thong ban rah biang ïa ka nam lahduh ha ka sien kaba ar ha kane ka lympung, u Bah Bobby u la ong, “Ngi don ïa ka thong ban rah biang ïa ka nam lahduh, hynrei ïa mynta ngin hap ban pynleit jingmut shwa na ka bynta kine ki jingïakhun kiba dangsah jong kane ka group. Ngi don ruh ïa ka jingangnud ban ïoh rung sha ka semi final bad kumjuh sha ka final ha kane ka lympung.”
Une u Coach u la pynpaw ba ïa ki rangïalehkai la pynïalehkai lang bad kiba ïashim bynta ha ka Second Division League lem bad kiba dangkhie dangsan, hynrei ha kajuh ka por la hap ban pynshong ruh ïa ki katto katne ki rangïalehkai kiba don hapdeng ki jingmynsaw.
“Ha kane ka lympung ngi la ailad lang ïa ki rangïalehkai kiba dangkhie dangsah napoh shlem ai jinghikai bad kumjuh ïa ki rangïalehkai kiba ïashim bynta ha ka Second Division.”
Wat la ki la don katto katne ki klob kiba la pynpaw ka jingsngewbynñiaw halor ka jingpynmih kyndon aiñ da ka Meghalaya Football Association (MFA) ban pynïalehkai ar ngut ki rangïalehkai kiba hapoh 21 snem ka rta ha man la kawei-pa-kawei ka jingïalehkai, u Bah Nongbet u la pynpawba ka SLFC kam don jingeh eiei halor kane ka kyndon. “Ngim don jingeh eiei halor kane ka kyndon namar ngi don bun ki rangïalehkai Under-21 ki la san lyngba ka shlem ai jinghikai.”
Kumba ka paw ïa kane ka kyndon ym shym la pyntreikam ha ki lympung ïalehkai kiba la pynlong ha kylleng ki district ha u snem ba la dep bad kiba bun ki klob ki la soi beit tang da ki rangïalehkai kiba la san (senior) bad ym ki rangïalehkai kiba hapoh 21 snem ka rta.
“Hooid ha kiwei ki klob ki lah ban shem jingeh bha namar bym don ba pynïaid ïa ki Youth League bad wat ka Under-19 kaba ju pynlong da ka Shillong Sports Association (SSA) kam don shuh, hynrei ha nga hi kane ka kyndon ka long ka jingïarap kaba khraw ïa kito ki khynnah kiba dangkhie dangsan ba kin ïoh ïashim bynta lang ha kane ka lympung khnang ba kin nangkiew shaphrang ha ka kam ïalehkai phutbol.”
Ka SLFC kan pynkhreh ïa ka jingïakhun kaba ar pyrshah ïa ka Pyndengrei SCSC ha ka 27 tarik, kumjuh ïa ka Mawten ha ka 31 tarik, ïa ka Seven United SCC ha ka 3 tarik u Jylliew bad khatduh eh kan ïakynduh pyrshah ïa ka Riangdo YSCA ha ka 6 tarik.
