Sepang, Jymmang:
Kawei na ki khlur ialehkai siat Suloi jong kiba duna dkhot-met bad ruh kaba lah khur ia ka takma Ksiar na ka Paralympic ka Avani Lekhara, ha ka lympung ialehkai kaba mynta ha Changwon ka World Shooting Para Sports World Cup kaba dang iaid shakhmat mynta, katei ka nong-ialehkai ka ri ka la lah ban khur noh shalade ia ka takma Rupa.
Kumta ruh ha kaba iadei bad katei ka jingshimbynta jng katei ka nongialehkai ha ka lympung, ka khubor ka iathuh ba ka Lekhara da tang katto katne dor-thong ka lah duh noh ia ka lad ban khur takma Ksiar ha ka jingiakob siat jong ka ha ka 10m Air Rifle Standing SH1 Finals.
Shuh shuh ruh katei ka nongialehkai ba dang 21 snem ka la lah ban kamai da 10.3 ha ka kylla iakhun ba 24 na ka bynta ban kynthuplang ia ki dor-thong ba ka lah khur na ki jingkhun sha ka 250.1 da kaba duh noh ia ka lad ban khur ia ka kyrdan ba nyngkong ba lah bat da ka nongialehkai na Sweden ka Anna Benson bad ruh ha kaba katei ka nongialehkai ka ri ka la lah ban pynioh sha ka ri baroh kawei ka ka takma ba 100 na ka kam ialehkai jong kiba duna dkhot-met ha kum katei ka jait jingialehkai. Kham hashuwa, ka Avani ka la lah ban siat bha haduh ba kan da khur ia ki 626.5 da kaba wan balai ha ka qualification.
Ka khubor ka iathuh ruh ba katei ka lympung ialehkai kaba long mynta ha Changwon ka long kaba sdang ka aiom ialehkai na ka bynta ka aiom ialehkai jong ka World Shooting Para Sports bad ka ban tyrwa ruh hakhmat ki nongialehkai ia ka quota na ka bynta ka Paris 2024 Paralympic.
