Shillong, Jymmang 25:
Ka Khasi Hills Autonomous District Council (KHADC) ha ka Sngi Palei ka la pynsdang ïa ka jingkhynra laisen khaïi (Trading Licence) na bynta ki kali kamai ba la ñiah da ki bar Jylla ha kylleng ki jaka ka nongbah Shillong.
Ïa kane ka jingkhynra la pynlong ha ki jaka kaba don ki bar jylla kiba ñiah ïa ki kali kamai, ban pyntikna ba baroh ki nongñiah kali kamai kiba dei ki bar jylla ki dei ban bud ïa ka aiñ ka KHADC, ban shim ïa ka laisen khaïi ba kin ïoh ñiah kali kamai.
Kane ka jingkhynra ka la sdang naduh ka por 11 baje mynstep bad ki jaka ba la pynlong ïa ka jingkhynra ki kynthup naduh ka Mawprem Taxi Stand, Motphran, MUDA Parking Lot, Luckier Road, Laitumkhrah, Dhankheti, Malki, Barik, Polo, Golflink, Nongmensong, Nongthymmai, Rynjah, Madanrting, Happy Valley, Mawlong Hat, Khlieh Ïewduh bad Jhalupara Taxi Stand.
Lah ban kdew ba dang shen ka synjuk ki nongñiah taksi ka East Khasi Hills, ka la dawa ïa ka KHADC ban pynlong ïa ka jingkhynra Trading License jong ki kali bar jylla namar ka jingjyllei ki bar jylla ba kamai taksi khlem da don ïa ki kot ki sla, ka Trading License, Professional Tax bad kiwei kiwei, kaba la ktah jur ïa ka kamai jakpoh jong ki nongñiah taksi trai riewlum ka jylla.
Kane ka jingdawa ka la mih ruh dang shen na ki nongñiah taksi ha Khyndailad, kiba la byrngem ban nym shah kamai ïa ki kali bar jylla namar ka jingshah shoh ki nongñiah taksi ha ka kynhun ki bar jylla.
Ha kaba ïadei bad kane ka jingkhynra, na ka liang u CEM ka KHADC, Bah Titostarwell Chyne, u la ong ba ka council haduh mynta kam pat ïoh jingkheiñ pura katno ngut kiba don laisen khaïi bad katno ngut kiba kamai khlem laisen khaïi, bad ong ba ïa ka kaiphod ba pura yn sa ïoh ha ka Sngi Thohdieng, naba yn dang bteng ïa kane ka jingkhynra.
