Shillong, Jymmang 25:
U President ka Hill State People’s Democratic Party (HSPDP), Bah KP Pangniang, u la ong ba lada ka jingdawa jong ka seng ban phiah noh ïa ka jylla Khasi-Jaiñtia bad ka Garo kan urlong, ka jingïakren ban ïa bhah ïa ka jingthungkam thungjam kan nym don shuh.
“Ka kham khor ban ong to ïa khlad noh ban ïa kaba ong ban ïa bhah mar biang namar ka la kham eh hynrei ngi haduh uta u pud ngi la kren ïa kane namar ngi ïohi shisha ba ka don ka jingeh ban shna ïa ki aiñ ban ïa biang lang bad ban ïa tarajur ïa kiwei pat ki Jaitbynriew,” la ong u Bah Pangniang haba kren sha ki lad pathai khubor ha ka Sngi Palei,
U Bah Pangniang u la ong ba kam don kano kano jingñiew beiñ ïa ki paralok na Ri-lum Garo ne ka jingpyrkhat ban ïoh jingmyntoi shibun shalade, hynrei ka jingbhah ka dei ban long katkum ka sur bad ka jingdon jong ki paidbah.
“Ïa kane ka Reservation Policy ruh, ngi kwah ban wanrah ïa kata ka jingïakren ha ka sorkar MDA ban sngewthuh ba ka la dei ka por bad ym dei ban pynbor bad ma ki ruh ki sngewdei ban ong ba ka dei kaba donkam ban pynbha shuh shuh ba kata ka 40/40 kan long kaba ïahap katkum ka jingdon jong u paidbah,” la ong u Bah Pangniang.
Ha kaba ïadei bad ka jingdawa ban pynrung noh ïa ka ktien Khasi hapoh ka khyrnit ba phra jong ka riti synshar ka ri, na ka liang ka seng haba ka buddien halor kane ka la lap ba napdeng ki 38 tylli kiba la dawa ban ithuh ïa ka ktien jong ki, ka ktien Khasi ka dei kaba hakhmat duh.
“Namar ba ngi don artylli ki Jaitbynriew, ngi hap dawa ba dei ban ïa ïoh lang ma ki bad ïoh lang ma ngi kaba long mawjynthut,” la ong u Bah Pangniang.
Ha kaba ïadei bad ka jingshong shah thngan jong u President ka Voice of the People Party (VPP), u Bah Ardent Miller Basaïawmoit, na ka liang u Bah Pangniang u la ong ba um don eiei ban batai ne ban ong ïa ka jingïohi ba kham bha jong ka seng VPP bad um don eiei ban ong pyrshah ïa kaei kaba ka seng VPP ka don ïa ka jingthmu na ka bynta ka Jaitbynriew.
“Ngam don eiei ban batai ïa kaei kata ka jingïohi ba kham bha jong ki bad ngam don eiei ban ong pyrshah ïa kaei kaba ma ki, ki don ka jingthmu kaba bha na ka bynta ka Jaitbynriew namar ki don la ka jong ka bynta kum ka seng,” la ong u Bah Pangniang.
