Shillong, Jymmang 25:
Ka Rangdajied United ka la nang jan ban ïoh rung sha ka semi-final ha ka Meghalaya State League 2023, hadien ba ka la lah ban pynliem noh ïa ka Rymbai Iawpynsing da 3-0 kol ha ka jingïalehkai jong ka Group-B kaba la long ha Kiang Nangbah Stadium kaba ha Jowai.
U Oresterwell Langshiang u la long u rangthep kol uba stet tam ha ka lympung ïalehkai MSL, bad ïa kiwei pat ki ar kol la thep ha ka kylla miet na ka bynta ban jam sha ka kyrdan ba ha khlieh jong kane ka group ban ïaryngkat mar 10 point bad ka Ladthadlaboh. Hynrei ka RUFC ka la ïoh ban lamkhmat hadien ba ka la tam lyngba ka jingïapher kol (+11 la +9). Ha ka kylla miet katei ka kynhun ka la ïoh ban thep sa ar kol lyngba u Aibiangmame Nongneng (70′) bad u Wansiewdor Nengnong (81′).
Ha kane ka jingïakhun, ka Rangdajied ka la pynpaw ïa ka jingtbit na ka bynta ban thep ïa ka kol kaba nyngkong tang ha ki 15 sekhon lyngba u Ores. Tang mar ïa sdang kane ka jingïalehkai, u Tremiki Lamurong u la shut ïa ka bol sha u Wansiewdor, uba la pynbuh pat na ka bynta u Langshiang bad u Ores um shym la pynlehnohei ïa kane ka kabu ksiar.
Hadien katto katne por ka Rymbai ka la pyrshang ban ïakhun tyngeh, hynrei kam shym la lah ban pynphai bad ha kajuh ka por ka la lah ban khanglad ïa ka Rangdajied ban thep kol biang haduh kaba kut ki 45 minit.
Hadien ba la bteng ïa ka jingïakhun jong ka kylla miet, ka Rymbai ka la pyrshang ban khanglad ïa ka Rangdajied, hynrei kam shym la lah ban leh eiei namar ka la shah thep biang ïa ka kol kaba ar ha ka minit kaba 70 lyngba u Aibiangmame hadien ka jingïarap lang da u kapten u Knerktilang Buam.
Hadien shiphew minit ka la don ka jingpyrshang ban thep kol da u Bansuklang Bina, hynrei u la shah khanglad noh ha u rangap kol ka Rymbai u Christopher Lyngdoh. Pynban u Nengnongum um shym la pynlehnohei ïa kane ka kabu ksiar na ka bynta ban pynlong ïa ka RUFC ban khur syndon ïa ka jingjop.
Na ka liang ka Tournament Committee jong ka MSL ka la pynshai ba ha kaba ïadei bad ka jingïalehkai ha ka Sngi Balang ha Jowai, ka Ladthadlaboh ka la jop da 3-0 kol pyrshah ïa ka Mulait United. Ïa kine ar kol la thep da u Stephanson Pale (40’Penalty &60′) bad ïa kawei pat la thep da u Nickyboy Swer (46′).
