Washington, Jymmang:
Ka United States ha ka Sngi Balang ka la pynbna halor ka jingmynjur ban die ia ki tiar siat NASAMS ba $285 Million sha ka Ukraine hadien ba ka Ukraine ka la wad lad ban ioh ia ki tiar kiba kham khlaiñ khnang ba kan lah ban iada ia la u jong u pud- u sam na ka kti jong ka Russia.
Ka tnat Defence Security Cooperation Agency jong ka US ha ka Sngi Palei ka la ong ba kumba la iohi ba ka Ukraine ka donkam ban pynkhlaiñ noh ialade ha kane ka kynti bad kumta ruh la ong ba da kane, kan iarap shibun ia ka Ukraine ba kan ioh ban pynkhreh kham bha ialade khnang ba kan lah ban iada ialade bad ban iakhun pyrshah ruh ia ka Russia ha ka por ba ka Russia ka pynjur ia ka jingthombor.
La ong ba katei ka jingdie jong ka US ia ki tiar thma sha ka Ukraine ha kane ka por, ka long ruh kum shi bynta ban pyniaid shakhmat ia ka kam iadie- iathied bad ka jingai jingkyrshan ia ki para marjan ri hapoh jong ka dew bah Europe.
Haba iadei bad ka jingdie ia kitei ki tiar ha kane ka kynti, kan ym kynthup ia kino kino ki nongtrei sorkar ne ki kontraktor nalor ka jingiakut da ka sorkar US bad ka Ukraine.
Kumta la ong ba hadien ba ka State Department ka la ai jingmynjur ia ka Ukraine haba iadei bad katei ka kam ha katei ka sngi, ka DSCA pat ka la phah ia ki jingtip sha ka Congress, khnang ban pyndep ia ka jingiasoi haba iadei bad ki kam pisa- pilaiñ.
Kumjuh ruh la ong ba ka United States ka la ai jingkyrshan na ka por sha ka por ia ka Ukraine hapdeng ka jingiakhun thma jongka pyrshah ia ka Russia bad ki jingiarap bad jingnoh synñiang jong ka US ki la kot ia ka shiphew billion dollar tam. Hynrei la ong ba kitei ki tiar kiba kan phah ha kane ka por pat kin long hi da ka jingiadie- iathied, ym kaba shu ai sngewbha ne ai jingiarap sha ka Ukraine.
Namar kumba la iohi ruh ba ka Ukraine ka khlaiñ bor da ka jingiakhun nalor suiñ bad kumta ruh kitei ki tiar thma ha kane ka por ki dei ki ban pyndonkam ha ka jingiakhun ha suiñ.
