Shillong, Jymmang 25:
Ka kynhun ki rangïalehkai U-17 jong ka ri kan pynkhreh ban ïakhun pyrshah ïa ka FC Augsburg (U-17) ha ka prokram kilanmet ka ban long ha ka Sngi Thohdieng ha Augsburg, Germany.
Kane ka jingïalehkai kan long ha ka por 8.30 mynmiet bad kan long ka jingkilanmet kaba lai na ka bynta kane ka kynhun ka ban dang don hapdeng ka jingpynkhreh ha Germany.
Dangshen mynta u bnai, kane ka kynhun ka la ïoh ban ïashim bynta ha ki ar tylli ki jingïalehkai pyrshah ïa ka kynhun ïalehkai U-16 bad U-19 na ka VFB Stuttgart (1-3) bad ka SSV Reutlingen U-16 (6-1).
“Ngi ïoh ban kilanmet kumba katto katne sngi hadien kaba kut ka jingïalehkai kaba khatduh jong ngi bad ngi la long kiba la khreh na ka bynta ki ar tylli ki jingïalehkai ha Germany,” la pynpaw u coach u Bibiano Fernandes.
Kane ka kynhun ïalehkai U-17 ka la ïai bteng ka jingpynkhreh na ka bynta ka AFC U-17 Asian Cup (ka ban long ha u bnai ban wan ha Thailand). Kumta ka la ïai bteng ban kilanmet bha ha Spain kumba shibnai hashwa ban kynriah sha Stuttgart, Germany ha ka 16 tarik mynta u bnai.
Hadien ki ar tylli ki jingïalehkai ha Stuttgart, bad hadien ba la ïoh ban sakhi ïa ki katto katne ki jingïalehkai jong ka lympung Bundesliga, kane ka kynhun ka la poi ha Augsburg na ka bynta ki prokram kilanmet jong ka taiew ha Germany.
“Ka jingkilanmet ha Germany ka la long kaba biang bha naduh ki jaka ïalehkai bad ki khynnah ki la ïoh shibun ki jingïarap lyngba ki coach ha Stuttgart,” la ong u Fernandes.
Kane ka kynhun ïalehkai U-17 ka ri ka la poi ha Augsburg ha ka sngi Palei bad kan pynkhreh ïa ka jingïalehkai kaba nyngkong pyrshah ïa katei ka kynhun ha ka sngi Thohdieng.
“Ka Augsburg ka long ka kynhun kaba kynsai ha Europe bad ngi khmih lynti ba kane ka kynhun ïalehkai U-17 kan lah ban ïalehkai bha. La khmih lynti ba kan long ka jingïalehkai kaba itynnad namar ki khynnah ki la nangkiew ha ka kam ïalehkai,” la ong u Fernandes.
Kane ka kynhun hadien ba la pyndep ïa ka jingpynkhreh ha Germany, kan leit sha Thailand artaïew shwa ban sdang ka AFC U-17 Asian Cup khnang ban pynïahap bad ka jinglong ka mariang. Kane ka kynhun kan ïakhun pyrshah ïa ka Vietnam ha ka 17 tarik u Jylliew, Uzbekistan (June 20), bad ïa ka Japan (June 23) kiba don ha Group-D.
