Imphal, Jymmang:
Ka jylla Manipur sa shisien ka la ïoh ban mad biang ïa ka jingmih ki jingïakajia kiba jur ha ka Sngi Balang mynta ka taiew ha kaba la ki paidbhur ki la leit ban thombor bad pynjulor ïa ka ïing sah jong u Myntri ka tnat PWD – Govindas Konthoujam kaba don ha ka thaiñ Ningthoukhong Bazar – ka thaiñ kaba hap hapoh ka jingkhmih jong ki bor pulit ka Bishnupur PS.
Kat kum ki jingïoh lum khubor la ïathuh ba ha katei ka sngi ki paidbhur ki la leit ban rung jubor hapoh ka ïing sah jong u myntri bad pynjulor ïa bun tylli ki jingdon jingem jong u, kynthup ïa ki shuki ki jingkhangïit, bad ki kali kiba la pynïeng ha phyllaw. Shuh shuh na ka liang ki paidbhur ki la donkti ban wiang ding ruh ïa ki kot ki sla kiba donkam kiba don ha ka kamra trei kam jong u Myntri.
Shuh shuh sa ha kawei pat ka jingïakajia la ïathuh ba sa kawei ka kynhun kaba kynthup ïa ki longkmie bad ki samla ki la leit ban khang ïa ka surok kaba pynïasoh ïa ka thaiñ Moirang Lamkhai bad ka thaiñ Thinungei. Na ka liang kitei ki ‘riew kynthei ki la khanglad ruh ïa ki bor pahara ka Central Reserve Police Force (CRPF) bad Rapid Action Force (RAF) ba kin leit pahara ïa ka shnong Moirang hadien ka jingmih jong ka jingïakajia kaba jur kaba la wanrah ruh ïa ka jingshah pynïap jong uwei u samla.
Ha katei ka jingkhang lynti, na ka liang ki bor pulit ka thaiñ Bishnupur mar syn ïoh jingtip ki la leit mar mar sha katei ka thaiñ bad pyndonkam ruh da ki lyer pynsat khmat ban pynher krad ïa ki paidbah kiba la ïalum lang shi jaka. Ha katei ka jingjia la ïathuh ba kim shym la don satia kino kino ki briew kiba la mynsaw.
Kat kum ki jingïohlum khubor la ïathuh ba na ka liang ki paidbah kiba la don bynta ha ki kam ban pynmih ïa ki jingkulmar ki la pyrta ruh da bun jait ki kyntien ban pynrem ïa ka sorkar. Ki la pynpaw ïa ka jingpyrshah kaba jur halor ka jingdawa ban ïoh da la ka jong ka jylla, ban ïada ïa ki trai muluk na ki nongwei, ban pynsangeh jingpyndonkam ïa ki kynhun lehnoh Kiki ban phiah ïa ka jylla Manipur, bad kumjuh ruh ki la pynmih da ka jingdawa ba u Myntri Rangbah u dei ban hiar shuki noh. Na ka liang ki paidbah ki la dawa ruh na ka sorkar jylla ba ka dei ban pynbiang ïa ki lad jingïada kiba kyrpang na ka bynta ki nongshong shnong jong ka thaiñ Tronglaobi.
Ha ka jingjia shah leit thombor jong ka ïing sah u Myntri ka tnat PWD la ïathuh ba na ka liang u myntri um shym la don satia ha la ïing ha ka por ba katei ka jingjia ka la jia.
Sa ha kawei pat ka jingjia kaba la jia ha ka sngi Balang, la ïathuh ba na ka liang ki runar kiba la kieng atiar bha ïalade ki la leit ban wiang ding ïa ka shlem trei kam jong ka Manipur Mountaineering Institute (MMI) kaba don hajan ka Loktak Hydro-Electric Project, Henglep sub-division jong ka Churachandpur district.
