Shillong, Jymmang 25:
U khlur ïalap ilekshon ka United Democratic Party ha Sohïong konstitwensi, Bah Amazing Kurbah u ngeit skhem ba u MLA ka UDP uba dang shu jop na Sohïong, Bah Synshar Lyngdoh Thabah un kren ïa kane ka jingdawa u President ka VPP, Bah Ardent Basaïawmoit ban pynkylla biang ïa ka bhah thung kam thung jam katkum ka jingbun briew.
Kane ka jingpynpaw u Bah Amazing Kurbah ka dei ha ka por ba u wan pynshngaiñ ïa u Bah Ardent Basaïawmoit ha ka jingshah thngan jong ka sngi kaba lai jong ka 25 tarik Jymmang 2023.
Haba ïakren bad u Bah Amazing u la ïathuh ba ka mynsiem ka jong u ka la kwah ban wan naduh ka sngi sdang ban shong shah thngan, hynrei u la wan mynta ka sngi naduh dangstep ban ai mynsiem lang.
“Nga dei tang u nongïalap ilekshon ha ka seng UDP, ngam dei u President ne u nongkitkam uba khmat, hynrei nga dei tang u nongkyrshan. Tangba ka jingwan kyrshan jong nga ïa u Bah Ardent kam mut ba nga wan ïasoh sha ka seng VPP, hynrei nga wan na ka bynta ka jingmyntoi jong ka jaidbynriew” u la ong.
Nangta u la batai ruh ba ka jingieid jaidbynriew ka dei namar u sngewkhia ïa la ki jong ki khun ki kti, ïa ki para marjan bad ïa ki bahaïing hasem ka dei kata ka jingieid jaidbynriew.
Nalor kane, u la pynpaw ba kumba u MLA ba mynta ka UDP na Sohïong, Bah Synshar Lyngdoh u la kular ban kren ïa kane ka bhah thung kam u don jingkyrmen ba un kren ha kine ki sngi.
Ha kajuh ka por u la ong ba lada jia eiei ïa ka koit ka khiah jong u Bah Ardent, ka sorkar ka dei ban shim ïa ka jingkitkhlieh.
Ha kane ka sngi, ka synjuk ki nongñiah taksi ha sor bad khapsor ki la pyrta da ka sur kaba jam “im slem Bah Ardent, im slem Bah Ardent” ha ka por ba ki leit ban ai mynsiem lang ïa u Bah Ardent haba u pynlong ka jingshong shah thngan ha Additional Secretariat.
Ha kane ka synjuk nongñiah taksi ki don 32 tylli ki Association bad kin sa pynlong ka jingsangeh kamai ban wan ai jingkyrshan biang lada ka sorkar kam sngap ïa ka jingshah thngan u Bah Ardent.
Haba ïakren bad u Bah Pynsuk Youroy uba dei u General Secretary, u la ïathuh ba mynta ka sngi ki nongñiah kali ki la sangeh kamai namar ki wan ban ai mynsiem ïa u Bah Ardent namar ki sngewthuh kane ka jingïakhih ka long kaba donkam ïa ki pateng ban wan.
