Shillong, Jymmang 25:
U President ka Voice of the People Party (VPP), Bah Ardent Basaïawmoit, u la sdang ban pang ka kti kamon namar ka jingbun palat ki paidbah kiba wan khublei kti katba u dang shong shah thngan hakhmat ka Additional Secretariat kaba la ïaid mynta lai sngi kynthih.
Kane ka jingpang ka kti kamon u Bah Ardent ka dei namar la shu khublei kti sah khlem sangeh ïa ki paidbah baroh shisngi kiba la wan ai mynsiem ha ka jingïakhih ban dawa pynthymmai noh ïa ka bhah thung kam kaba long kat kum ka jingdawa jong ka por.
Ha ka por 8:00 baje mynmiet ki doktor ki la thew biang ïa ka met jong u Bah Ardent hadien ba u la shah thngan la palat lai sngi, hynrei ki la pyntip ba u dang biang ka met ka phad.
Nangta la ïohi ba ki paidbah ha ka por janmiet ki la ïeng laiñ haduh surok bah ban leit ai mynsiem ïa u Bah Ardent.
Namar ba u Bah Ardent u la pang ka kti, ki dkhot ka VPP kiba la pynbeit laiñ ki la ailad ïa ki paidbah ba kin shu kitbok hajan ne ki lah ban shu rah ka kti.
Kum ban pynkynmaw kane ka jingïakhih shah thngan u Bah Ardent ka la sdang nyngkong shwa hakhmat ka Secretariat ha ka 23 tarik Jymmang 2023 naduh ka por 10 baje mynstep. Katba ha ka por 10 baje mynmiet u la leit ban shong noh hakhmat Additional Secretariat bad bteng haduh mynta sngi khnang ban suk ïa ki paidbah kiba wan ban ai mynsiem bad ban lait na ka jingpynwit u slap.
Haba ïakren bad u Bah Ardent u la ïathuh ba haduh mynta ka sngi u dang biang ka met ka phad bad um lah ban tip haduh lano un sdang ban tlot bor lada u dang bteng ban shong shah thngan.
U la ïathuh ba ka jingwan ai khublei ïa u ha kane ka jingshong shah thngan ka la long na kylleng ki jaka lada dei ha ka por mynsngi bad kham bun ka dei ha ka por janmiet.
“Haduh mynta ka sorkar ka dang sngap man-man ïa ka jingshah thngan jong nga, hynrei nga la rai ba ngan nym mih nangne ka jaka tad haduh ban da ïoh ïa ka jingdawa” u la ong.
Halor ka jingkren u Bah Prestone ban nym ïakren eiei halor ka bhah thung kam, u Bah Ardent u la ong ba un shong shah thngan khlem buh por tad haduh ba ka sorkar kan da pynbeit thymmai ïa ka bhah thung kam.
Shuh shuh u la ong ba ïa mynta u dang shong shah thngan tang marwei, hynrei un sa peit hadien namar ka jingshah thngan kam shong ha ka jingbun paid, hynrei ka dei ka jinglen lade.
Ha ka por 8:30 mynmiet la ïohi ki paidbah kiba kynthup naduh ki longkmie, longkpa bad ki samla na shnong Pomlakrai kaba hap ha Nongkrem konstitwensi kaba u Bah Ardent u mihkhmat ki la wan da ka bos Smit ban leit ai mynsiem ïa la u jong u nongmihkhmat uba la shong shah thngan mynta la lai sngi hakhmat Additional Secretariat.
Haba ïakren bad ki samla kynthei ki la ïathuh ba kum ki paidbah ki sngewkmen haba ki ïoh ïa u MLA uba ieid ïa ka jaidbynriew namar kane ka jingshah thngan u Bah Ardent ka long kaba donkam ïa ki samla kiba dang wad kam sorkar.
