Shillong, Jymmang 25:
Ka seng United Hynñiewtrep Movement (UHM) ha ka Sngi Palei ka la leit ban ai jingkyrshan ïa u President ka Voice of the People Party (VPP), u Bah Ardent Miller Basaïawmoit, uba la shong shah thngan mynta la sngi lynter hajan ka Additional Secretariat halor ka jingleh kuman jong ka sorkar ban pynbeit ïa ka bhah thungkam thungjam bad ban pynsangeh ban pyntreikam ïa ka Roster System.
Haba kren sha ki lad pathai, u Bah Charlie Johnson Rani uba dei u President ka UHM, u la ong ba kum ki khun samla kiba don ha ka sengbhalang ki sngew ïoh mynsiem ban ïohi ba don u ’riew rangbah kum u Bah Ardent uba la kloi ban mih shakhmat na ka bynta ka dawbah dawsan jong ka jaitbynriew khamtam jong ki khun samla.
U Bah Rani u la ong ba ka jingwan jong ka seng ha katei ka sngi kam long tang ka jingwan ai mynsiem, hynrei ban ai ka kti kamon kti kadiang ïa u Bah Ardent bad kumjuh ïa ka seng VPP baroh kawei ba un nym khuslai lane duh jingkyrmen bad u la pyntikna ruh ba ka UHM baroh kawei kan don ryngkat lang bad u Bah Ardent.
“Na ka liang ka UHM ka pyntikna naduh mynta ka sngi, ngin ïa don ryngkat bad ngin ïa ai lang ka kti kamon ka kti kadiang la ka long ha kano kano ka bynta,” la ong u Bah Rani.
Shuh shuh u Bah Rani u la ong ba ka jiingong jong ka sorkar ba kan peit tang ïa ka Roster System khlem da ktah eiei ïa ka Reservation Policy ka long kaba bakla. U la ong ruh ba ha ka riti pynïaid kam jong ka seng, ka la don ka jingdawa kaba ka seng ka la dawa syndon ïa ka Khasi State bad lada ka poi haduh u pud ba kan don ka jingïapait ne ka jingïaphiah Jaitbynriew hapdeng u Khasi-Jaiñtia bad u Garo, ka bha ban ïoh noh ïa la ka jong ka jylla khnang ba ka bhah thungkam thungjam kan long kaba ïahap.
“Na ka liang jong ngi lei, ha ka riti pynïaid kam jong ka seng, ka la don ka jingdawa jong ngi ha kaba ngi la dawa syndon da ka Khasi State, lada ka long kumta bad kan poi haduh u pud ba kan pynïapait bad pynïaphiah Jaitbynriew hapdeng u Khasi-Jaiñtia bad u Garo, ngi lei ngi kmen palat namar lada la long haduh katta ka bha ba ngin ïoh la ka jong ka jylla,” la ong u Bah Rani.
