Shillong, Jymmang 25:
Ki pulit ka Anti Narcotic Task Force (ANTF) jong ka East Jaiñtia Hills (EJH) ki la ïoh ban kurup haduh 10 kilo u ‘Ganja’ ne kynja bad ruh ban ïoh kem ïa uwei na Khliehriat.
Katkum ka khubor na ki pulit la ong ba hadien ka jingïoh ïa ka jingtip kaba bniah, ki pulit ANTF ki la pynlong ka jingpynap shrip ha ka Sngi Palei hajan ka Moowakhu, surokbah NH-6 ha ka por kumba 2.30 mynsngi ban ïoh kem noh ïa u nongkhaïi drok, uba la don ha lynti ban pynpoi ïa u byrni kynja ba khia haduh 10.8 kilo na Shillong sha East Jaiñtia Hills.
La ong ba mar ïa ïohi ïa kane ka kali kaba don ïa u number ML05-G-0965, ki pulit ki la phah sangeh bad hadien ba la pyndep lut ki jingdonkam katkum ka kyndon NDPS Act bad hakhmat jong ki nongsakhi paidbah, la pynlong ka jingkhynra bad ïoh kurup ïa u kynja ba la thep hapoh ka byrni.
Une u briew uba la shah kem u dei ba la tip kyrteng kum u Deiborlang Sutnga, 32 snem, na ka shnong Sutnga Pohshnong ha East Jaiñtia Hills. Na une u briew nalor u kynja, la kurup ruh ïa katei ka kali kaba la pyndonkam bad kawei ka mobile phone.
