Shillong, Jymmang 25:
Ka tnat Secretariat Administration Department (SAD) ka la pynbna ban thung kam na ka bynta shipor ïa 10 ngut ki Office Assistant-cum-Stenographer bad kane ka jingpynbna ka la mih wat hadien ba la pynbna ka Sorkar Jylla ban pynsangeh shwa ïa baroh ki jingkhot thung kam kiba thymmai kumba la rai ha ka jingïalang jong baroh ki seng saiñ pyrthei halor ka Roster System.
Kane ka jingpynbna ban thung kam shipor la pynmih da ka tnat SAD, kaba don ïa ka tarik kaba 22 tarik Jymmang, 2023 ha kaba yn thung kam shipor na ka bynta lai bnai lane 89 sngi ha ka jingsiew kaba long T.20,000 shibnai.
La ong ba lah ban bteng ïa ka kam da kaba pynthymmai biang ïa ka jingthung kam katkum ka jinglah ban trei ïa ka kam bad jingbiang por ha ka rukom wan trei.
Ha kane ka jingpynbna, la ong ba ïa ki kot ki sla ki nongthep kam lah ban phah sha ka tnat SAD ha shwa lane haduh ka 31 tarik Jymmang, 2023.
Haba kynthoh ïa kane, ka Khun Hynñiewtrep National Awakening Movement (KHNAM) ka la ong kane ka jingpynbna ka long kum ka jingpynkhieñ ka Sorkar ïa ka jingkular kaba ka la khlei sha ka seng ha ka jingïalang jong baroh ki seng saiñ pyrthei (all party meeting).
U Vice President ka KHNAM u Bah Thomas Passah, u la ong ba ka Sorkar lyngba u Myntri Rangbah, ka la kular ban pynsangeh shwa ïa baroh ki byrta khot thung kam (advertisement) na ka bynta ki kam sorkar bad ïa kane u Myntri Rangbah u la pynpaw ruh lyngba ki lad pathai khubor.
“Hynrei kaba sngewlyngngoh ka long ba ka SAD hadien jong ka jingïalang ki seng saiñ pyrthei (all political party meeting), kaba la long ha ka 19 tarik Jymmang, 2023, ka la pyllait paidbah ha ka 22 tarik Jymmang 2023 ïa ki kam kiba dei ban thung shipor. Mynta ka jingkylli kaba mih ka long mano ba shet kylla ka Sorkar ne ka SAD. Ïa kane, na ka liang ka seng, ngi pynrem jur bad ka pynpaw ïa ka jinglong khyllung khynnah ka Sorkar halor ki jingkular,” la kynthoh u Bah Thomas.
