Tura, Jymmang:
Wat la ka jingïakren halor ka jingpynbeit pud ka dang ïaid hapdeng ki 2 Jylla (Meghalaya & Assam) da ka jingthmu ban pynbeit noh ïa kane ka mat kaba dang sahteng la slem bah mynta, ka jingpyrshang ban knieh jubor ïa ka jaka ka Meghalaya da kito kiba na Assam ka la paw pyrthei ha South West Garo Hills District.
Haba ïadei bad kane, na ka liang ka shnat treikam ka AHAM na kane ka distrik ha ka Sngi Balang ka phah ïa ka jing-ujor sha u Deputy Commissioner ka West Garo Hills, u Jagadish Chelani.
Ki dkhot ka seng ki la ïakynduh ruh ïa u DC ha ophis treikam jong u ha Tura ban kyrpad ïa ka jingtuklar jong u halor katei ka bynta.
Katkum ka jingïathuh u General Secretary ka AHAM, South Western Zone, u Wester G. Sangma, katei ka jingjia ka la jia ha ka Sngi U Blei ha kaba ki ophisar ka Assam ki la wan bad pyrshang ban kam trai ïa ka jaka jong kawei ka trai shnong, ka Indong Ch. Sangma ba ka dei jong u (L) Akash Ali uba na Dhapguri Mankachar PS, South Salmara, Assam. Katei ka jaka ka don ha ki sawdong-sawkun jong ka Ïew Chattibui hajan Monabari Outpost, South West Garo Hills.
Katkum ka jingbatai ka AHAM, ka Assam ka la sei ïa ki kot ki sla haba ïadei bad ka (suba) mukotduma halor ka jing-ïa-ka-jia jaka hapdeng u (L) Akash Ali bad uwei u Shan Kumar Hajong ba la ujor ha ïingbishar ka Assam, ha kawei ka liang kaba la ïalam sha ka rai ba la pynmih da ka ïingbishar kaba ïashah ne kyrshan ïa u (L) Ali.
Kaba sngewlyngngoh ka long ba kam don kano-kano ka jingkdew ïa ka kyrteng jong ka Indong Ch Sangma, ka trai jaka ha kitei ki kot ki sla. Ka Sangma ka don ïa ka ‘patta’ haba ïadei bad katei ka jaka kumjuh ka ‘receipt’ ba dang shen jong ka khajna ba la siew sha ka GHADC.
“Lada don ka mukotduma halor ka jing-ïa-ka-jia ha ïingbishar, la dei ban ujor pyrshah ïa ka Sangma, kaba don ïa ka ‘patta’ jaka. Haba ngi la kylli ïa ki halor ka nongrim aïu ba la ujor mukotduma, kim shym la lah ban jubab bad phet noh,” la ong u Wester. Nalor katei ka jingjia, ka la don ruh ka jingpynpra ïa 71 tylli ki dukan jong ki nongshong shnong da ki ophisar ka Assam.
Na ka liang u Deputy Commissioner u la kular ban shimkhia bad leh ïa kaba donkam halor katei ka bynta ba kynthup ïa ka jingphah pulit sha katei ka thaiñ. Ka seng ka la phah jingujor ruh sha u CEM ka GHADC, u Albinush Marak, uba la kular shimkhia ïa katei ka kam.
