Shillong, Jymmang 25:
Ka Myntri ka tnat ka Koit ka Khiah, ka Kong Ampareen Lyngdoh kaba dei ruh ka nongaiktien ka Sorkar Jylla ka la kyntu ïa u Bah Ardent M Basaïawmoit ban sangeh noh ka jingshong shah thngan bad ban wan sha ka miej jong ka jingïakren.
Lah ban pynkynmaw ba ka jingshong shah thngan khlem buh por jong u Bah Ardent M Basaïawmoit, uba dei u President ka seng Voice of the People’s Party (VPP) bad MLA ka Nongkrem ka la jam sha ka sngi balai halor ka jingïakhih ban dawa bishar biang ïa ka Reservation Policy.
“Nga kyntu ïa u MLA ka Nongkrem ban wan sha ka miej ïakren halor ki mat jingdawa ba u don, ngam lah ban kular ban pynurlong lut ïa ki jingdawa ba u don hynrei nga donkam ban sngewthuh shai shwa, kiei ki mat jingdawa ba u don,” la ong ka Kong Ampareen.
Ka la ong ba lada u Bah Ardent u weng noh ïa ka jingïakhih shah thngan, kan long ka jingbha ïa baroh bad kan plie ruh ka lad ban ïashong jingïalang bad ban ïathir ïa ki mat jingdawa bad ban ïathir kumno ban ïaid shakhmat khlem da pynmong ïa kano-kano ka jaidbynriew.
Ka la ong, “Ngi dei ki nong Meghalaya bad ngi don lai tylli ki jaidbynriew bad ngi kwah ban ïada ïa ka bha ka mait jong baroh. Sngewbha Bah Ardent wan sha ka miej ban ïakren.”
